La FIS e Swiss Ski han decis da stritgar l'etappa dal Tour de ski en la Val Müstair, quai rapporta la Posta Ladina. La planisaziun da las finanzas saja memia malsegira. Plinavant n'haja betg avunda letgs a disposiziun en la val.
Nova etappa en il Vallais
Il Goms en il Vallais duai remplazzar Tschierv sco etappa dal Tour de ski. Il president dal comité d'organisaziun, Guido Mittner, deplorescha la decisiun, e di ch'ins perdia l'attenziun internaziunala. En media vista veglia il comité purtar in'autra occurrenza da sport en la vallada.
Sis giadas ha il Tour de ski gì lieu en la Val Müstair. Quest onn ha el cumenzà en la Val Müstair, lura èsi ì vinavant ad Oberstdorf en Germania e la fin ì en la Val di Fiemme en l'Italia.
