Sin las pistas dal Term Bel fissi bain stà pussibel d'ir cun skis, ma sin las pistas plinengiu manca la naiv. Perquai ch'il runal tranter la pendiculara e la sutgera na po betg ir, han ins stuì serrar las pistas. Restadas avertas èn la via da scarsolar tranter l'Alp Malix ed il Brambuscenter. Er ils trails per gianellas restan avertas.
Cun l'abunament «Uffa» a Savognin
Per abunents ed abunentas da la carta da la stagiun da Brambrüesch datti la pussaivladad da tuttina anc pudair ir cun skis. Quest'emna pon els ed ellas ir gratuitamain cun skis sin il territori da Savognin. Er là manca la naiv e be la mesadad da las pistas èn avertas. Ma tras la naiv tecnica datti entant pistas cun bunas cundiziuns. Tenor ils responsabels dal territori da skis sajan quest'emna vegnids blers skiunzs e skiunzas da Cuira a Savognin ch'han tratg a niz l'offerta speziala, cifras precisas na rimnan els dentant betg.
Sin binaris e cun sugas tras l'aria a Pradaschier
Per persunas ch'èn en tschertga d'activitads d'enviern er sper la pista datti opziuns a Pradaschier tar Churwalden. Sper la scarsolera da stad, ch'è er averta d'enviern, datti ina uschenumnada tirolienne u «zipline» – ina suga d'atschal tendida per glischnar giu vi dad ina rolla – ed in parc da rampignar.
Ils skiunzs e las skiunzas tschertgan ils territoris pli gronds. Per la scarsolera da stad avain nus giasts da dapertut.
Tenor il mainafatschenta Andrea Müller saja la stagiun cun pauca naiv stada in sfida. Els sajan cuntents cun ils giasts per la scarsolera e la tirolienna, cun ils giasts da skis dentant betg. Il dumber da giasts per questas spiertas sper la pista saja sa redublà quest onn.