La butia da la maisa per animals sa chatta sut la staziun da Cuira en in local pitschen. Las curunas èn emplenidas cun da tuttas sorts pavel, cuppinas, giugarets, animals da plisch, cordas e biscuits per animals. Dshamilija Camenisch maina questa butia e dat ora il pavel. Ella e sias collegas che sa brattan lavuran voluntariamain.
Tut quai che sa chatta en la butia èn donaziuns da persunas privatas, firmas ed era da fundaziuns. L’organisaziun sezza na cumpra nagut, pervia da quai hai quai ch'i ha.
Tgi survegn il sustegn?
Las persunas che vulan prender pavel u autras chaussas per lur animals ston avair ina conferma ch’ellas survegnan daners da l’uffizi social u ch’ellas retiran ina renta d’invaliditad. Era persuna che gudognan pli pauc ch’ina tscherta summa, pon vegnir en la butia.
- Ina persuna singula na po betg gudagnar dapli che 2’500 francs per mais.
- Ina famiglia na po betg gudagnar dapli che 4’000 francs per mais.
Persunas en situaziuns difficilas
Bleras da las 92 clientas e clients vegnan regularmain e prendan lur agen satg per emplenir cun pavel. Dshamilija Camenisch di, che las persunas che vegnan èn tut differentas. Per exempel persunas ch'han in grev destin u persunas che han lavurà tut lur vita ed ussa na tanscha la renta betg.
-
Bild 1 von 3. En il pitschen local datti da tuttas sorts: cordas e mantels.... Bildquelle: RTR.
-
Bild 2 von 3. ...cuppinas en differentas furmas e colurs... Bildquelle: RTR.
-
Bild 3 von 3. ... pavel en tutta variaziun: bletsch, sitg e biscuits. Bildquelle: RTR.
Ina clienta vegn a cumprar en per ses dus giats. Suenter in bainvegni amiaivel ed in’egliada en il sistem, prenda Dshamilja Camenisch ina chavogna e va cun la dunna atras la butia. Cun quai che tut il pavel è da donaziuns, n'hai betg adina il medem e betg adina tut.
Per ils giats da la dunna pudess quai esser in problem, ella sez prenda quai dentant cun umor e declera che ses dus chars sajan fitg heiclis. Questa giada han ella e ses giats gì fortuna ed i ha pavel da lur marca preferida. Sche quai fiss betg stà il cas, alura fiss la dunna ida a cumprar quai en ina butia usitada.
Quai custass dentant spert ina giada 150 francs mintga mais – e quai avess in effect sin ses budget. Cun ils raps ch’ella spargna tar la maisa per animals po ella enstagl ir a mangiar in glatsch cun sia figlia.
Jau sun educatura suletta. Per ina mamma ch’è suletta ed ha uffants è quai qua in levgiament. Era sche jau lavur, jau percorsch quai tar mes budget la fin dal mais.
In’autra dunna vegn a cumprar pavel per ses dus giats ed in chaun. Ella di che surtut ils accessoris per ils animals sajan chars e ch’ella è cuntenta sch’ella chatta magari insatge. Questa giada cumpra ella in tarpun ed ina suga. Tar il pavel sto ella inditgar quant grev ch’il chaun è, cun quai che gronds han da bun dapli pavel che chauns pitschens.
Sche ti es tar l'uffizi social, alura na vegns betg pli davent uschè svelt.
Ella è ruschnada èn ina situaziun finanziala difficila, cura ch’ella è vegnida in speranza nunspetgadamain cun 40. Ella è persula ed aveva nagin che guarda da ses figl.
Pertge han els alura animals?
Per tut las persunas ch’èn vegnidas speravi na fissi nagina opziun da dar davent lur animals, era sch’ellas pudessan spargnar. L’amur e l’impurtanza dals animals da chasa saja memia gronda.
E la manadra, Dshamilja Camenisch di ord experientscha, che bleras persunas avevian gia lur animals avant ch’ellas èn vegnidas en la povradad. Alura sajan ils animals enorm impurtants e dettian segirezza – per part èn els ils megliers amis.