Ils 24,4 milliuns francs concedids dal suveran da Cuira, cun in spazi da 25 pertschient pudessian tenor la situaziun actuala gist anc tanscher. Trais milliuns francs pli chara vegnia l'infrastructura da la pendiculara sezza. Ed era la staziun a val vegnia a custar dapli, inditgescha Küng. Sch'ils daners na tanschan betg duai la citad da Cuira gidar.
Plans cun novas gondlas da 10
Las novas gondlas cun plaz per mintgamai 10 persunas vegnan furnidas da la Garaventa SA Rotkreuz. A partir da la stagiun 2026/27 duai la nova pendiculara manar sur la staziun a mez Fülian sin la muntogna da chasa da Cuira. Quella custa senza las staziuns 15,1 milliuns francs, scriva la pendiculara.
La decisiun per la pendiculara da Garaventa saja stada unanima en il cussegl d'administraziun da las pendicularas. La Garaventa SA tutga tar la gruppa austriaca da Doppelmayr ch'è dominatur dal martgà.
Pendiculara custa trais milliuns francs dapli
La pli gronda sfida finanziala saja il lung temp tranter il 2017 cura ch'ins haja fatg il quint d'investiziun per la pendiculara ed il 2026 cura che la pendiculara duai vegnir en funcziun. Oriund eran planisads 12 milliuns per la pendiculara. La cabina nova custa dentant trais milliuns dapli che budgetà. Per pudair reducir la canera uschè bain sco pussaivel, stoppian ins investir 1,7 milliuns dapli. Il pretsch d'atschal che saja ì ensì ed er per autras materias primas, custia radund 1,4 milliuns dapli che previs. Ils custs na pon betg surpassar ils 24,4 milliuns (+/-25%).
Il matg 2019 ha la populaziun da Cuira approvà in credit d'investiziun da 24,4 milliuns francs (+/- 25%) per remplazzar la pendiculara da Brambrüesch. Quest credit cumpiglia er ils custs per ils bajetgs en la citad, la staziun a miez e la staziun sisum la muntogna. Il restaurant da panorama a Fülian, vulan las pendicularas realisar cun il chapital da participaziun dals furniturs cun 7% dal volumen.
Ils proxims pass
Suenter ch'il project per la pendiculara è surdà, vai uss per serrar giu ils projects pertutgant la planisaziun dal territori e pertutgant la cumportabilitad per l'ambient. Lura vegn elavurà fin l'emprim quartal 2023 la dumonda da bajegiar. Per quel vegn la lubientscha lura da l'Uffizi federal da traffic. La lubientscha vegn spetgada per l'entschatta 2025. Suenter che la halla da la citad ven lura spazzada il medem onn, duai la nova pendiculara vegnir averta il december 2026.
