Pendicularas sut tensiun - Territoris da skis planiseschan da spargnar energia - Novitads

Pervia da la crisa d'energia che smanatscha l'enviern pudessan era ils territoris da skis stuair reducir lur manaschi. Quai di Berno Stoffel, il president da las pendicularas svizras en in'intervista da radio SRF.

audio

Per tadlar: curt e cumpact

ord RTR Audio dals 16.08.2022.

laschar ir. Durada: 1 minuta 23 Secundas.

Stefan Arnold, il directur da las pendicularas a Mustér è gist vid cumprar la forza electrica per il proxim onn, quai ch'è per il mument ina gronda sfida cunquai ch'ils pretschs èn creschids massivamain.

Igl è sco da dar lotto a la bursa. Ins quinta ch'il pretsch sa dublegia anc ina giada. Nus quintain cun 25 fin 35 raps per l'onn proxim.

Autur: Stefan Arnold directur pendicularas Mustér

Blers onns han pendicularas che cumpran lur forza electrica sin il martgà liber profità da forza electrica bunmartgada. Anc avant dus onns custava l'ura kilowatt circa tschintg raps, uss ha Stefan Arnold sin maisa offertas da 25 enfin 35 raps per ura kilowatt, pia tschintg enfin set giadas uschè bler sco anc avant dus onns. Per la cassa da las pendicularas a Mustér munta quai, ch'il quint da forza electrica custa empè dals 500'000 francs da nov 800'000 francs. Cunquai che las pendicularas tutgan dentant ensemen cun il Resort Catrina che fa ina svieuta da radund 15 milliuns francs per onn, giaia quai da pajar il quint pli aut cun las fatschentas currentas.

audio

Pendicularas ed electricitad: Exempel Pendicularas Mustér

ord Actualitad dals 28.07.2022.

laschar ir. Durada: 3 minutas 7 Secundas.

Pendicularas senza anc in resort en il dies tutga quai forsa pli ferm.

Autur: Stefan Arnold directur pendicularas Mustér

Sch'ina persuna privata ni in'interpresa dovra dapli che 100 uras megawatt en in onn, lura ha quella la pussaivladad da bandunar il provediment da basa ed ir sin il martgà liber. Là èsi pussaivel da far contracts cun furniturs da forza electrica. Avant paucs onns è quai stà fitg rentabel, perquai ch'ils pretschs dals contracts eran pli favuraivels che quels dal provediment da basa. Uss èn quels pretschs dentant creschids enormamain uschia ch'els èn in toc pli auts cumpareglià cun il provediment da basa. Il problem è dentant: Sch'ins va ina giada sin il martgà liber na pon ins betg pli turnar en il provediment da basa. Sch'in contract va a fin ed ins na stipulescha nagin nov, alura rivan ins directamain en il provediment da remplazzament. Quel n’è dentant betg attractiv per clientas e clients, perquai ch'el è in toc pli char ch'il provediment da basa, uschia ch'il contract sin il martgà liber è per regla meglier.

audio

Pendicularas ed electricitad: Contracts d'energia

ord Actualitad dals 28.07.2022.

laschar ir. Durada: 4 minutas 2 Secundas.

Nagina survista

Quantas pendicularas che èn propi pertutgadas dals pretschs pli chars d'energia e sche insaquantas pudessan schizunt avair da cumbatter per l'existenza è dentant grev d'eruir. Er l'uniun tetgala n'ha betg ina survista, uschia Marcus Gschwend il mainagestiun da las Pendicularas grischunas.

Mintga interpresa è sezza responsabla co ella tracta ses custs. I dependa er quant blera energia che lur stabiliments dovran.

Autur: Marcus Gschwend mainagestiun Pendicularas griscunas

Latiers vegn: Betg tut las pendicularas ston quest onn cumprar lur forza electrica sin il martgà liber. Entginas han contracts pli lungs sur plirs onns per in pretsch favuraivel, autras retiran lur forza electrica dal provediment da basa. Er quella forza electrica vegn probablamain pli chara, dentant betg en ina tala dimensiun.