Cun in minus da 16% han las pendicularas da la Svizra Orientala da magunar in sumegliant pass enavos sco il Grischun. Quai mussan las cifras communitgadas da l’organisaziun Pendicularas Svizras. Auter che la regiun da las Alps dal Vad e dal Friburg han tut las regiuns svizras dumbrà pli paucas emprimas entradas dal matg fin il fanadur. Da considerar è dentant che las cifras dal 2023 èn stadas ordvart autas.
Vis sur 5 onns main gravant
Sco Pendicularas Svizras scriva en sia communicaziun, mussia l’analisa cun resguardar ils davos tschintg onns ina bilantscha positiva per la branscha. Cun trais excepziuns saja il dumber da giasts creschì en tut las regiuns. Auts plus mussan la Svizra Centrala e la Part Sura Bernaisa. Entant è il Grischun sco suletta regiun confruntada cun in ferm minus da 18% da las emprimas entradas, cumpareglià cun la media dals davos tschintg onns. Pitschens minus han il Vallais e la Svizra Orientala.
