Cun dapli agen chapital ed il sustegn da la vischnanca duai i dar vinavant las pendicularas Tschiertschen. Cun l'augment da l'agen chapital da 1,2 milliuns francs sajan las finamiras surpassadas, scrivan las pendicularas sin lur pagina d'internet. Almain 600'000 francs fissan stads necessaris, en tut hajan ins segnà aczias da 1,2 milliuns francs.
Quai duai tanscher per cuntinuar cun il manaschi per ulteriurs 10 onns, scrivan las pendicularas. Ellas han gì ina fitg schletta stagiun d'enviern 2022/23. Sulet 12 dis èsi stà pussaivel d'ir sin pista en il territori che n'ha nagins indrizs da far naiv.
Suenter las mesiras politicas ch'ins aveva prendì da la radunanza communala l'entschatta fanadur, hajan ins uss er cuntanschì l'augment dal chapital. Uschia possian las pendicularas er far las investiziuns necessarias da 3,2 milliuns francs ils proxims onns.
