La regenza grischuna sto sclerir sch’ils trens da la Surselva pon en l’avegnir puspè sa fermar a la staziun da Cuira Vest. En quest senn ha il Cussegl grond surdà unanimamain a la regenza ina incumbensa dal deputà da l'Allianza dal Center Ernst Sax da Sursaissa.
Lez ha crititgà che la midada da l’urari il december muntia che Sursilvanas e Sursilvans stoppian ir fin a Cuira, midar tren e turnar a Cuira Vest. Quai na saja betg chapaivel – gist perquai che la staziun Cuira Vest vegnia modernisada e blers pendularis dovrian quella per arrivar al center da l’administraziun chantunala Sinergia ubain tar la Scola auta spezialisada.
Plirs deputads da la Surselva han exprimì lur quitads davart la situaziun e speran che la regenza tegn en egl il svilup e curregia puspè l'urari.
Regenza vul tegnair en egl e curreger
Il minister da traffic Mario Cavigelli ha concedì en la debatta dal Cussegl grond che questa situaziun na saja betg optimala, malgrà ch'ins perdia betg uschè bler temp cun stuair ir a Cuira e turnar. Ils quatter trens impurtants da la bun'ura vegnian er a sa fermar cun l'urari 2023 a Cuira Vest. Il problem pertutgia pia be las colliaziuns da la saira.
Ina meglieraziun saja pir pussaivla cura che la staziun da Versomi saja renovada, per ch’ils trens pon sa cruschar là. Uschiglio avessan fermadas dals trens sursilvans a Cuira Vest consequenzas per l'entira offerta da la Viafier retica.
In tact da mes'ura cumplessiv per la Surselva empermetta la regenza per l'onn 2024.
