Avant 20 onns na pareva il vitg sursilvan Valendau betg d'avair in futur ch'empermetta bler: adina pli paucs abitants ed abitantas e nagin che vuleva investar en il vitg. Ils ultims 20 onns ha Valendau – ch'è ina fracziun da la vischnanca da Val Stussavgia – dentant fatg in svilup remartgabel. Ozendi, dus decennis pli tard, prosperescha il vitg numnadamain puspè. Quai en spezial grazia ad ina figura centrala: il student dal seminari scolastic mirveglius Donat Caduff ch'aveva dà l'impuls per fundar l'uniun «Valendas Impuls».
Quest svilup remartgabel ed il giubileum da l'uniun «Valendas Impuls» ha Valendau festivà il 2024 cun ina gronda festa dal vitg. Cun in concert la sonda saira en la halla polivalenta ed ina fiera la dumengia ha la populaziun pudì celebrar ses vitg. Ina preschentaziun dals projects gronds ch'èn vegnids realisads durant quels 20 onns hai era dà.
In student a la tschertga dals fastizs da Valendau
Che Donat Caduff, student dal seminari scolastic, è insumma sa fatschentà pli en detagl cun Valendau è plitost stà in schabetg. Caduff, ch'è en sasez creschì si en il vitg vischinant da Sagogn, aveva l'incumbensa l'onn 1994 da scriver ina lavur en il rom «Enconuschientschas da la patria» per ses studi. Per questa raschun è el sa mess sin via avant 20 onns cun apparat da fotografar e dumondas per sias retschertgas – a Valendau per prender sut la marella il vitg per l'emprima giada.
-
Bild 1 von 3. Il student ch'ha dà l'impuls al svilup a Valendau. A chaschun dal giubileum da 20 onns da «Valendas Impuls» ha Donat Caduff prendì sut la marella in'ulteriura giada il vitg da Valendau. Bildquelle: RTR.
-
Bild 2 von 3. «Augenschein in Valendas» dal 2007. Ses emprim cudesch – ch'era oriundamain sia lavur da seminari – ha dà l'impuls per ils gronds svilups a Valendau, perquai ch'el era l'emprim ch'ha tschentà dumondas centralas davart l'avegnir dal vitg che na pareva da lez temp betg fitg empermettent. L'uniun «Valendas Impuls» è lura sa furmada ed ha prendì activamain enta maun il svilup dal vitg. Bildquelle: RTR.
-
Bild 3 von 3. Ina nova ediziun actualisada. A la festa ha Donat Caduff preschentà ses nov cudesch «Zurück in Valendas» nua ch'el ha documentà il svilup dal vitg grischun durant ils ultims dus decennis. Bildquelle: RTR.
La lavur da seminari ha la finala survegnì grond resun e l'atun 2003 è Donat Caduff lura perfin vegnì envidà en la halla polivalenta da Valendau ad ina scuntrada publica ch'aveva la finamira da tematisar l'avegnir dal vitg. La publicaziun da Donat Caduff ha era dà il segn da partenza per lantschar l'uniun «Valendas Impuls» il settember 2004 – a l'entschatta cun mo 13 commembers e commembras, ma spert dumbra l'uniun var 80 commembers. L'uniun edescha la lavur dal seminarist Donat Caduff sco cudesch.
Il svilup ch'è succedì ils ultims 20 onns a Valendau hai jau persequità mo da lontan.
Sin dumonda da l'uniun «Valendas Impuls» è Donat Caduff sa mess in'ulteriura giada sin via per prender sut la marella il vitg da Valendau. Uss – 20 onns pli tard – ha l'autur Donat Caduff preschentà ses nov cudesch «Zurück in Valendas. 20 Jahre Valendas Impuls – eine Wiederbegegnung» a la festa da giubileum. En quel ha el documentà cun bleras fotografias, tge ch'è tut passà ils davos 20 onns. Era diversas protagonistas e protagonists ch'èn stads engaschads fermamain en ils projects gronds da «Valendas Impuls» vegnan a pled en il cudesch da Donat Caduff.