«Per l'anniversari tut il bun, char tunnel dal San Bernardino!»

Per onurar il tunnel da las grondas speranzas – il San Bernardino – han indigens, politichers ed istorichers fatg festa a San Bernardino. En il center da la saira èn dentant er stadas quellas persunas ch'avevan gì avant decennis la visiun dad in tunnel sco er quellas ch'avevan fabritgà el.

Laschar ir video «Festa per il 50avel dal tunnel dal San Bernardino»

Festa per il 50avel dal tunnel dal San Bernardino

3:15 min, Telesguard dals 4.12.2017

Avant 50 onns, durant in di da december da fradaglia, eran sa rimnads indigens e politichers per inaugurar il tunnel da 6'600 meters – quella giada il pli grond tunnel da las Alps. Las speranzas eran grondas. Ils indigens spetgavan in grond svilup per lur regiuns. 50 onns pli tard è la bilantscha main positiva: Il tunnel n'ha betg purtà blers avantatgs, mabain oravant tut bler traffic a las regiuns Moesano e Valragn.

La festa dals blers pleds

Tuttina èsi vegnì fatg festa 50 onns pli tard: Ad ina saira da december, puspè da fradaglia, èn sa rimnads indigens, politichers ed istorichers per far ensemen festa per il 50avel dal tunnel.

Igl è vegni chantà e mangià ed er discussiunà: Ad ina discussiun da podium han politichers indigens debattà da las speranzas e trumpadas che l'istorgia dal tunnel da San Bernardino ha purtà. Ultra dad els ha ina deschina da persunas da la politica, dal turissem u da la branscha da construcziun fatg in pled.

Nagin tunnel senza morts e ferids

Durant la saira èn er vegnidas svegliadas regurdientschas dals miniers e lavurers dal tunnel. Il tunnel da 6'600 meters ha custà la vita ad indesch umens. 1'000 umens èn vegnids ferids durant las lavurs.

RTR Telesguard 17:40

Emissiun tar quest artitgel