Actualmain èsi uschia, che commembers e commembras da la regenza Grischuna survegnan suenter lur uffizi ina renta per vita duranta. Pli ditg che la persuna era en uffizi, pli auta è la renta. Actualmain survegnan els ina renta d'enfin 115’000 francs per onn. Il chantun vess da dar ora 1,3 milliuns francs pli pauc per onn.
La finamira da la cuntraproposta
Il Cussegl grond è cunter quest’iniziativa ed ha fatg ina cuntraproposta. Era els èn per abolir la renta per vita duranta. Tenor a cuntraproposta duessi dentant dar ina prestaziun transitorica, pia duessan anteriurs commembers e commembras da la regenza survegnir daners durant trais onns u sch’els èn schon pli vegls lura enfin la vegliadetgna da pensiun. Tar questa proposta vess il chantun da dar ora 1,15 milliuns francs pli pauc per onn.
Intginas cifras tar la renta
Tar il dretg actual cun la renta a vita duranta paja il chantun tenor las explicaziuns en il cudesch da votaziun en media 28,7 onns ina renta per anteriurs commembers e commembras da la regenza. Sche l’iniziativa vegniss acceptada fissan quai nulla onns. E tar la cuntraproposta che pretenda ina prestaziun transitorica da maximalmain trais onns u enfin la vegliadetgna da pensiun, fissan quai tenor ina stimaziun 2,2 onns ch’il chantun paja ina renta. La paja da cussegliers e cusseglieras giuvernativas durant l’uffizi è enturn 270’000 francs l’onn.
Il Cussegl grond recumonda da refusar l’iniziativa chantunala da la PPS. E d'approvar la cuntraproposta dal Cussegl grond.