La Banca naziunala svizra ha fatg ils emprims nov mais da l'onn in minus massiv. Surtut perditas da curs sin aczias e tschains èn stadas responsablas per la perdita da record. Concretamain demussa la Banca naziunala ina perdita da 142,4 milliardas francs per la perioda dal schaner fin il settember da quest onn. Suenter in minus da 32,8 milliardas l’emprim e 62,4 milliardas il segund quartal èn uschia anc ina giada 47,2 milliardas vegnidas vitiers il terz quartal da l’onn.
Dal tuttafatg surprendentas n’èn las cifras betg – cun ina gronda perdita en il terz quartal era vegnì quintà en vista a las turbulenzas als martgads da finanzas, surtut il settember. Sch’i na dettia betg anc ina vieuta dramatica durant ils ultims dus mais da l’onn, saja la distribuziun usitada dal gudogn a la Confederaziun ed als chantuns periclitada acutamain, scriva la Banca naziunala.
Da supportar per il chantun
Mez october aveva il chantun budgetà da survegnir radund 60 milliuns francs da la Banca naziunala svizra per l'onn proxim. Sche quels na vegnissan betg, fiss quai da supportar, di il minister da finanzas dal Grischun Christian Rathgeb sin dumonda dad RTR.
Cler quai faschess mal da betg survegnir 60 milliuns francs. Dentant tar entradas da bunamain 2,7 milliardas na bitta quai betg sin il chau l'entir quint.
Il budget chantunal na sto er betg pli vegnir adattà suenter questa communicaziun da la Banca naziunala. Perquai che: «Quai dat er adina auters facturs el budget che mussan la fin finala in plus ubain in minus – il proxim temp vegn per exempel la guerra da l'Ucraina ad avair consequenzas sin il quint chantunal che nus na pudain betg preveder. Saja quai per exempel quai che pertutga alloschament da fugitivs ubain prezis d'energia», agiunta Christian Rathgeb.
