L'hotellaria en il Grischun ha nudà il mars 513'618 pernottaziuns. Quai è in plus dad 86.6% cumpareglià cun la medema perioda da l’onn avant, cura ch’il lockdown aveva cumenzà. Quai scriva l’Uffizi per economia e turissem dal Grischun. Il dumber da giasts svizzers saja sa dublegià sin 385'193. Lura segua la Germania cun 72'876 pernottaziuns e silsuenter la Pologna cun 27'290 pernottaziuns.
Tut las destinaziuns profiteschan
Il mars dal 2021 han tut las destinaziuns dal Grischun nudà dapli pernottaziuns ch'il medem mais da l'onn avant. Uschia ha la destinaziun Flem Laax nudà il mars 2021 bunamain 69'000 pernottaziuns. Quai correspunda ad in augement da 150%. E cun stgars 152'000 pernottaziuns ha uschia la regiun Engiadina San Murezzan bunamain pudì dublegiar il dumber da giasts.
Gudagnà procentualmain il pli bler ha la Valposchiavo cun 2'088 pernottaziuns, quai che munta in agument da 270,9% cumpareglià il mars 2020 cun il mars 2021. Lura segua Val cun 7'965 pernottaziuns u in augment da 178.7%, suandà da Flem Laax cun in augment da 150.4%. Quai munta che durant il temp da pandemia e lockdown han bleras persunas tschertgà l'isolaziun. Ins ha vulì guntgir ils centers cun blera glieud.
Augment da las pernottaziuns en Svizra
En l'entira Svizra èn las pernottaziuns s’augmentadas per 47,1% sin 1,9 milliuns. Quai ha communitgà l'Uffizi federal da statistica. Il dumber da giasts da l’exteriur saja dentant sa reducì per 25,9%, cumpareglià cun l’onn avant. Quai ch'ins sto resgurdar, sch'ins cumpareglia las cifras è, ch'ils 16 da mars è vegnì ordinà l'emprim lockddown. Ils giasts da la Svizra han generà 1,5 milliuns pernottaziuns (103,9% / +743’000).
