Tar la procura publica grischuna duai dar duas plazzas da lavur supplementaras. In procuratur public dapli, vitiers ils 24 ch'i dat gia, sco era ina plazza en l'administraziun. Quai propona la regenza al Cussegl grond. Il minister da giustia, Peter Peyer di envers il schurnal regiunal dad SRF:
Nus vesain ch'il dumber dals cas è aut e la cumplexitad da quels s’augmenta era. Sche nus n'avain betg pli blers collavuraturs vegnin nus adina puspè en retard.
L'onn passà èn entrads tar la procura publica 20% dapli cas che l'onn avant. Actualmain èn bunamain 2'000 cas pendents. Spezialmain ils cas da criminalitad da cyber sajan s'augmentads.
