Siglir tar il cuntegn

Header

video
Chantun cumbatta per la staziun intensiva d'uffants en l'ospital
Or da Telesguard dals 22.11.2023.
laschar ir. Durada: 1 minuta 7 Secundas.
cuntegn

Petiziun Chantun grischun cumbatta per l'Ospital chantunal

Che la staziun intensiva d'uffants en l'Ospital chantunal grischun è en privel fa era quitads al minister da sanadad. Politicamain na possia il chantun Grischun dentant betg far bler encunter quests plans.

Er il minister da sanadad Grischun Peter Peyer ha suttascrit la petiziun per salvar la staziun intensiva per uffants en l'Ospital chantunal a Cuira. Che bunamain 25'000 persunas (stan 22-11) han suttascrit la petiziun, mussa tge muntada che questa staziun intensiva haja per la populaziun.

Sco cusseglier guvernativ grischun e minister da sanadad è el dentant in zic en in'autra posiziun. Mo el di er cleramain: Politicamain na possia la regenza grischuna betg far bler encunter il plan da stritgar ils tractaments spezialisads, sco per exempel quel d'uffants. Els possian cumbatter e far lobbying, ma actualmain betg dapli.

Dapi il 2009 è il Grischun numnadamain, sco er tut ils auters chantuns part da la rait interchantunala per medischina autspezialisada.

Questa rait ha fatg senn, mo uss va quella en ina direcziun che metta en privel il provediment da basa e quai n'è betg in bun svilup.
Autur: Peter Peyer Minister da sanadad GR

En questa rait datti in gremi spezialisà d'experts, per gronda part cun connex universitar che fa propostas. Ed in segund gremi da 10 persunas che prenda las decisiuns. Part èn là ils tschintg ministers da sanadad cun ospitals d'universitad plus tschintg ulteriurs ministers da sanadad (tranter auter er il Grischun cun Peter Peyer). Cun ina decisiun definitiva tge che capita cun differentas purschidas da la medischina autspezialisada a Cuira èsi da spetgar la primavaira 2024.

audio
La rolla dal chantun pertutgant la petiziun da mantegnair la staziun intensiva d'uffants
ord Actualitad dals 23.11.2023.
laschar ir. Durada: 3 minutas 44 Secundas.

Tge capitass suenter?

Suenter pudess sulettamain l'Ospital chantunal dal Grischun trair vinavant la decisiun tar il tribunal federal. Il chantun Grischun savess sco ultim pass, anc bandunar la rait interchantunala per medischina autspezialisada. Questa decisiun stuess dentant vegnir fatga dal Cussegl grond.

Ospital chantunal vul mantegnair la staziun intensiva per uffants

L'emna passada ha l'Ospital chantunal dal Grischun lantschà la petiziun per salvar la staziun intensiva per uffants en l'Ospital chantunal a Cuira. En l’avegnir duain numnadamain ils ospitals a Turitg ed a Son Gagl tractar ils uffants e las dunnas cun gravidanzas da ristga or dal Grischun e da la Svizra sid-orientala. Quai malgrà che l'ospital chantunal surpiglia gia oz regularmain uffants da tut la Svizra. Mintga minuta saja decisiva, sch'i va per la vita d'uffants e perquai veglia l'ospital chantunal s'engaschar che la staziun intensiva per uffants vegnia manada vinavant a Cuira.

audio
Petiziun per salvar intensiva d'uffants en ospital chantunal
ord Actualitad dals 15.11.2023. Maletg: RTR
laschar ir. Durada: 2 minutas 55 Secundas.

Concret vul la petiziun che l'ospital chantunal haja era era vinavant l'incumbensa da surpigliar:

  • tgira intensiva da naschientschas prematuras e la neonatologia
  • traumas grevs e politraumas inclusivamain traumas dal tscharvè tar uffants e giuvenils
  • oncologia d'uffants, sco fin uss, sco staziun da satellit da l'ospital d'uffants da Turitg
video
Petiziun per mantegnair la staziun intensiva d'uffants a Cuira
Or da Telesguard dals 15.11.2023.
laschar ir. Durada: 2 minutas 5 Secundas.

Medischina autspezialisada

La tgira intensiva d'uffants tutga tar l'uschenumnada «medischina autspezialisada» (HSM). Quella è organisada sin nivel federal. In gremi naziunal definescha tge che tutga tut tar la medischina autspezialisada. Alura vegnan las incumbensas repartidas sin ils differents ospitals.

Planisaziun «medischina autspezialisada»

Avrir la box Serrar la box

La planisaziun da la «medischina autspezialisada» (HSM) ha la finamira da garantir il provediment da la populaziun cun prestaziuns da HSM e succeda en duas parts.

Tge

En il rom da l'attribuziun vegn definì tge secturs che duain valair sco autamain spezialisads. Quests tractaments medicinals ston ademplir ils criteris: raritad, aut potenzial d'innovaziun, potenzial da reducir custs da persunal u tecnics sco er auta cumplexitad. Per vegnir taxads sco «medischina autspezialisada» ston esser ademplids almain trais da quests criteris. La raritad sto adina esser avant maun. En ina consultaziun pon las direcziuns chantunalas da sanadad, ils ospitals e las organisaziuns interessadas prender posiziun davart la tscherna. La decisiun finala vegn prendida da l'organ da decisiun HSM e n'è betg contestabla.

Tgi

Suenter che la definiziun da las prestaziuns è vegnida fatga, vegn instradada la segunda fasa da la planisaziun: l'attribuziun da las prestaziuns a singuls ospitals. Quells pon candidar per survegnir l'incumbensa da prestaziun per in sectur da la HSM, ston dentant ademplir ils criteris da qualitad generals sco er specifics per il sectur che vegnan fixadas da l'organ spezialisà HSM. Suenter l'evaluaziun da las candidaturas – inclusiv in'examinaziun da la rentabilitad ed ina controlla, sch'il basegn è vegnì ademplì – vegn la proposta d'attribuziun suttamessa ad ina consultaziun vasta. La decisiun definitiva d'attribuziun, glista d'ospitals HSM, vegn silsuenter prendida da l'organ da decisiun HSM. La glista d'ospitals HSM è giuridicamain lianta per tut ils chantuns e preceda uschia a la glista chantunala d'ospitals.

Link:
GDK – Medischina autspezialisada (HSM)

Per l'Ospital chantunal a Cuira n'è la pratica actuala, tge che tutga tut tar la medischina autspezialisada betg correcta, perquai ch'adina dapli parts vegnian definidas sco HSM, senza correspunder a las qualificaziuns necessarias. Uschia vegnia adina pli grev per ospitals centrals, che n'èn betg en in chantun cun ina universitad, da porscher las prestaziuns. Quai muntia era che la populaziun da quests chantuns sto far lungs viadis per ils tractaments. En il cas concret fissan quai oravant tut dunnas cun gravidanzas da ristga.

Era a Berna è la centralisaziun dals servetschs da HSM in tema. Uschia ha il cusseglier dals chantuns Martin Schmid inoltrà ina moziun.

RTR novitads 10:00

Artitgels legids il pli savens

Scrollar a sanestra Scrollar a dretga