57 fugitivs da l’Ucraina, tranter quels 24 uffants da scola, han vivì fin questa stad a Mustér. Els èn vegnids entras l’engaschi da persunas privatas en la Cadi. Betg tuts han pudì restar, perquai che Mustér n’avess simplamain betg pudì integrar tut ils uffants en scola.
Blers a Cuira e 13 persunas en auters lieus
Ensemen cun la vischnanca e las instanzas chantunalas hajan ins chattà soluziuns, di Marcel Suter, manader da l'uffizi da migraziun e dretg civil dal Grischun. La gronda part da questa gruppa abitescha uss a Cuira en l’alloschi collectiv ed ils uffants van en la nova scola per scolars ucranais. 13 persunas èn vegnidas repartidas en abitaziuns en auters lieus.
Betg tuts han midà voluntariamain
Ins haja prendì resguard sin ils giavischs, ma quai na saja betg ì tar tuts. Singulas famiglias n’hajan betg vulì ir a Cuira, di Marcel Suter. Perquai haja il chantun fatg trais plazzaments sfurzads. Ina da questas famiglias cun in uffant haja Mustér la finala tuttina tegnì. Las duas autras famiglias, che na vulevan betg sa chasar a Cuira, ha il chantun plazzà en Val Müstair.
Nov scolars è bler per Mustér
Dapi l’avust van anc nov uffants da l’Ucraina a scola a Mustér. Quai è anc adina bler en cumparegliaziun cun autras vischnancas. Ils pli blers scolars da l’Ucraina han – tenor indicaziuns dal chantun – suandantas scolas en il Grischun:
- scola da la citad da Cuira: 22 scolars
- scola da Schiers e conturn: 12 scolars
- San Murezzan: 12 scolars
Betg mo la capacitad da la scola è stada la raschun che blers Ucranais han stuì bandunar Mustér. A partir dal november n’avessan las famiglias betg pli pudì restar en il ressort che aveva mess a disposiziun abitaziuns. «Baud u tard fiss era gliez daventà in problem», di Marcel Suter, manader da l’uffizi da migraziun e dretg civil.
