Trais dis dura la sessiun d'october dal Cussegl grond che ha cumenzà glindesdi suentermezdi. En ses emprim pled d'avertura ha il president Tarzisius Caviezel appellà a l'engaschi communabel per il Grischun:
Lain s’engaschar communablamain per che noss chantun sa sviluppeschia cun success.
Quai munta che interess privats stoppian far plaz a schliaziuns che servan a la publicitad. Ed i saja da guardar sur l’agen parsepen ora – senza empermischuns vidas, mabain cun strategias, programs ed acziuns. Igl è stà l’emprima giada che Tarzisius Caviezel ha tegnì en sia funcziun sco «pli aut Grischun» in pled d’avertura.
La sessiun d’october dura trais dis – pia enfin mesemna saira. I spetgan trais dis cun temas zunt multifars.
Credit da 151 milliuns francs
Ils custs totals per in nov campus per la Scola auta spezialisada dal Grischun muntan a 178 milliuns francs. Actualmain èn ils bajetgs da la FHGR spatitschads en tschintg differents lieus a Cuira. Cun in nov bajetg duai vegnir stgaffì in center da scolaziun en la Pulvermühlestrasse per 1'700 studentas e students.
Il lieu ha il Cussegl grond gia discutà ed approvà avant quatter onns – uss vai per la finanziaziun, concret per in credit da 151 milliuns francs. Ina summa da 27 milliuns francs contribuescha la Confederaziun. Igl è da spetgar che deputadas e deputads acceptan quest credit, uschia ch'il suveran grischun po votar il mars 2023 a l'urna.
Temp da carenza
Cura dastga in cusseglier u ina cussegliera guvernativa surpigliar in uffizi suenter sia carriera en la regenza? Questa dumonda pudess evocar ina debatta interessanta. La PPS pretenda numnadamain in temp da carenza, pia in scumond per in tschert temp, per evitar conflicts d'interess. Vegnida activa è la partida suenter ch'igl è vegnì enconuschent questa stad che Mario Cavigelli surpiglia il presidi tar la Viafier retica l'onn proxim.
Sustegn survegn la PPS da la PS – lezza aveva gia fatg l'onn 2018 ina sumeglianta proposta che regenza e parlament han dentant refusà. L'Allianza dal Center e la PLD èn cunter in tal temp da carenza – la Partida verd-liberala decida pir durant la sessiun co votar.
Energia, energia, energia
Natiralmain ch'ina eventuala mancanza d'energia quest enviern occupa er la politica grischuna. Numerusas deputadas e deputads vulan survegnir respostas da la regenza tge ch'il chantun ha planisà da far. Quai vegn surtut a capitar durant l'ura da dumondas da mesemna bunura.
La stad aveva il minister d'energia Mario Cavigelli annunzià ina plattafurma da communicaziun e decis d'instradar ina part dal stab directiv per sa preparar sin ina eventuala crisa.
