A la radunanza communala da questa emna han abitantas ed abitants vulì savair daco che las tariffas d'energia a Churwalden sajan s'augmentadas uschè fitg. Blers en sala sajan stads frustrads, rapporta il schurnal regiunal da radio SRF.
Novs contracts a pretschs auts
La raschun per l'augment è che la Rabiosa Energie ch'è responsabla per il provediment a Churwalden ha stuì far novs contracts sin la fiera libra ch'ha pretschs fitg auts. Ch'ils pretschs sa sviluppian uschè extrem saja tenor il mainafatschenta da Rabiosa Energie, Otto Vitalini, betg stà previsibel. El conceda dentant tuttina ch'els hajan reagì memia plaun.
Nus n'avain betg fatg quai optimal e vis tscherts svilups memia tard. Retrospectivamain pudain er dir che nus avain cumprà memia tard.
Ch'ils consuments a Churwalden ston pajar in toc dapli per l'energia deplorescha er la presidenta communala Karin Niederberger. Per ella èsi impurtant ch'ins giaja sur ils cudeschs per reponderar la strategia da l'interpresa. Er Otto Vitalini ha ditg ch'els veglian adattar lur strategia da cumprar l'energia sin la fiera libra.
La vischnanca da Churwalden producescha sezza in terz da l'energia, dus terzs cumpra la Rabiosa Energie sin la fiera libra. Ditg hajan ins pudì far quai per in pretsch bass, quai saja sa midà, uschia l'interpresa.
