La Polizia chantunala ha infurmà davart la strategia «Kapo GR 2025+» che duai gidar a la polizia da s'adattar als basegns da l'avegnir ed il svilup en il chantun Grischun. Quai èn ils puncts impurtants:
- Etablir ina «chapientscha da manar persunal moderna e persistenta». Quai vul la Polizia chantunala cuntanscher cun scolaziuns.
- Plinavant saja central da porscher avunda equipament, meds, persunal ed infrastructura. In exempel per quella saja il nov punct da sustegn da traffic a Cuira sid.
- La collavuraziun cun auters uffizis ed affars vegnia adina pli impurtanta e duai vegnir sviluppada. Er sur ils cunfins chantunals e naziunals.
- La digitalisaziun, tranter auter cun il traffic da datas e rapports, che duai vegnir ora senza palpiri.
- L'attractivitad da lavur tar la polizia chantunala duai vegnir augmentada cun models da lavur parziala, pussaivladads da homeoffice u cun mesiras da paja.
En general saja da mantegnair, rinforzar ed optimar las cumpetenzas-clav da la polizia, numnadamain la gestiun d’eveniments, la protecziun e la defensiun da privels e la persecuziun penala. Quai pussibiliteschia da sa concentrar sin las spartas da la segirtad da traffic, da cumbatter la criminalitad e da garantir la segirtad publica. La polizia less uschia er reducir quantum da mesiras repressivas.
La realisaziun da la strategia capita pass per pass e vegn accumpagnada d'in management strategic. Ils responsabels han infurmà las ultimas emnas tut las collavuraturas ed ils collavuraturs da la Polizia chantunala.
