Siglir tar il cuntegn

Header

audio
Ueli Caluori - il cumandant da la polizia da Cuira va en pensiun
Or da Actualitad dals 16.03.2023. Maletg: RTR
laschar ir. Durada: 4 minutas 9 Secundas.
cuntegn

Polizia da la citad da Cuira Cumandant Ueli Caluori va en pensiun

Suenter 30 onns tar la polizia da la citad da Cuira va il cumandant Ueli Caluori en pensiun e surdat ses post. El guarda enavos sin sia carriera sco cumandant e dat in sguard sin il temp liber che spetga sin el.

Ueli Caluori passenta ses ultims dis sco cumandant da la polizia da la citad da Cuira. Suenter 30 onns tar la polizia, 20 da quels sco cumandant, va el en pensiun. Ses post banduna el cun sentiments maschadads.

Jau sun schon trist, quai è cler suenter uschè blers onns. Quella funcziun ha marcà mia vita professiunala , gea perfin mia vita privata. Da tschella vart ma legrel jau natiralmain fitg sin quest nov temp liber.
Autur: Ueli Caluori Cumandant partent da polizia da la citad da Cuira

Gugent haja Ueli Caluori gì las occurrenzas pli grondas sco la festa da Cuira. Là saja la collavuraziun cun ils organisaturs e las organisaturas ed era il contact cun ils giasts adina stà fitg impurtant ad el.

Nus essan adina stads cuntents, sche nus avain pudì dir ensemen cun l'organisatura u l'organisatur e cun ils participants che nus avain fatg bain quai e ch'i n'ha betg dà incidents considerabels.
Autur: Ueli Caluori Cumandant partent

Il mender sajan stads ils muments nua che persunas èn vegnidas donnegiadas. Saja quai collavuraturs e collavuraturas u era ina terza persuna. Suenter quels eveniments saja fitg impurtant che l'entir team lavuria si tut ensemen. La tgira dals collavuraturs saja adina stada zunt impurtanta per Ueli Caluori.

Per la pensiun haja il cumandant partent da la polizia intgins plans: el veglia giudair ses temp liber ed era ir suenter a ses hobis sco far sport, ir cun velo, sunar clavazin ed ir cun töf. I na vegnia en mintga cas betg ad esser lungurus ad el.

RTR actualitad 12:00

Artitgels legids il pli savens