Minimalmain è la qualitad d'aria sa meglierada l'onn passà. Quai mussan mesiraziuns da la surveglianza da la qualitad da l'aria Ostluft. I pertutga la Svizra orientala sco er Turitg. Las valurs directivas davart la qualitad da l'aria da l'Organisaziun mundiala da la sanadad (WHO) vegnan dentant surpassadas «cleramain».
Las limitas svizras da l'ozon, l'amoniac sco er cun il fulin che chaschuna cancer, vegnan er anc adina surpassadas. Almain 82% da la populaziun en il territori da l'aria da l'Ost saja exponida ad ina impestaziun da l'aria nuschaivla per la sanadad.
Mesiras portan fritg
Durant plirs decennis sa mussia che las mesiras politicas han purtà ina clera meglieraziun da la qualitad da l'aria. «Ma i dovra ulteriurs sforzs per proteger la sanadad tenor il stan actual da la savida, sco er per correspunder vinavant a las pretensiuns da la lescha davart la protecziun da l'ambient», ha scrit Ostluft plinavant.
Ostluft quinta tenor la communicaziun che la qualitad da l'aria vegnia anc a sa meglierar ils proxims onns. Vehichels che funcziunan cun diesel u benzin vegnissan remplazzads pli savens cun autos electrics. Tar l'agricultura, la funtauna principala da la contaminaziun d'amoniac, saja ultra da quai vegnì prescrit en la lescha il diever da tecnicas che reduceschan las emissiuns per purtar puschina.
Ostluft è la surveglianza communabla da la qualitad da l'aria dals chantuns da la Svizra orientala Appenzell Dadens e Dadora, Son Gagl, Turgovia sco er Schaffusa, Glaruna, Turitg, dal Principadi da Liechtenstein e da parts dal chantun Grischun. La rait da mesiraziun cumpiglia actualmain 18 staziuns che mesiran permanentamain.