La populaziun da Poschiavo ha dad eleger in nov «podestà», in president communal. Suenter otg onns banduna Giovanni Jochum da la PLD il timun da la vischnanca. Per sia successiun è s'annunzià cun Davide Vassella in unic candidat.
L'um da 40 onns va en cursa per la partida sanestra Valposchiavo Viva. Tenor Vassella n'è la politica da partida sin livel communal betg da grond’impurtanza.
Gea, jau vegn ad esser l'emprim podestà da la sanestra, quai ma fa losch. Dentant han las partidas sin livel communal bler damain impurtanza.
La populaziun da la Val Poschiavo ha elegì questa primavaira Davide Vassella sco represchentant en il Cussegl Grond. Cun el è er Gabriela Menghini-Inauen dal PPS vegnida elegida. Ella na veglia dentant betg ir en cursa per il presidi e desista, scriva la gasetta online Il Bernina.
Il pensum dal «podestà» da Poschiavo è remunerà en in pensum da 50%. Ils ultims sis onns ha Davide Vassella lavurà en in biro fiduziari a Poschiavo e vegn da cumbinar bain las duas lezias. El enconuschia er gia fitg bain las fatschentas da la vischnanca da Poschiavo. Davide Vassella è dapi trais onns e mez en il cussegl communal e vicepresident. Ultra da quai ha el ramassà experientschas sco cassier e chanzlist da Brusio.
Lavur datti avunda
En vista a las lavurs e sfidas dals proxims onns per la vischnanca da Poschiavo menziuna Davide Vassella la revisiun da la planisaziun territoriala, ma er mesiras che fan da basegn per far frunt a la demografia en la val.
Ina prioritad è segir da reussir a regiuvinar in pau nossa populaziun. Sco autras valladas cumbattain nus cun il medem problem, ils giuvens na turnan betg pli en val.
En in emprim pass vuless il futur podestà da Poschiavo emprender ad enconuscher tut ils affars communals cun las differentas persunas en uffizi. Oravant tut er il nov cussegl communal.
Cumbat electoral per suprastanza
Auter che per il presidi, vegni a dar in cumbat per ils quatter sezs en la suprastanza communala da Poschiavo. Annunzià lur candidatura han sper ils quatter cussegliers en uffizi, cun Romano Rossi in tschintgavel candidat.
La populaziun da Poschiavo decida a l’urna ils 27 da settember 2026.