Protecziun da datas vul dir, mintga persuna duai savair tge che capita cun sias datas. En il chantun Grischun datti perquai dapi l'onn 2002 la lescha da protecziun da datas. L'onn 2024 è quella vegnida revedida totalmain ed è entrada en vigur quest onn.
Mintga persuna ha il dretg e l'interess sin protecziun d'abus da sias atgnas datas e perquai dovri ina lescha. E quai avain nus qua en il chantun Grischun cun la lescha da protecziun da datas.
Cun la lescha da protecziun da datas è vegnida incumbensada ina persuna per la protecziun da datas. Quella lavurava dentant sin basa d'incumbensa privata per il chantun Grischun.
Cunquai che la protecziun è daventada pli impurtanta durant ils ultims onns datti dapi l'onn 2026 in post da surveglianza da datas che tutga ussa uffizialmain a l'administraziun dal chantun Grischun. Actualmain è la manadra da quest post, Gabriela Huber, anc suletta, ma il chantun è a la tschertga d'in substitut u ina substituta.
Quest nov post ha entant ina clera finamira. El guarda che las autoritads chantunalas e communalas tractian correctamain las datas persunalas. El controllescha che la lescha da protecziun da datas vegn resguardada e cusseglia las autoritads er en cas ch'i dat dumondas.
Quai èn dumondas en connex cun la lescha davart la protecziun da datas. Pia per exempel tge datas dastgan els dar ora. Dastg'ins dar ora nums, glistas d'adressas ad uniuns u ad organisaziuns politicas.
Impurtant saja da dir ch'il post na s'occupia betg cun persunas u affars privats. Per il post da surveglianza da datas saja ussa fitg impurtant – per accumplir la lavur da sensibilisaziun – da cuvrir ils basegns da las autoritads. Els hajan era gia survegnì dumondas per referats u scolaziuns.
Cun sensibilisar ils divers uffizis co ir enturn cun las datas persunalas vul'ins evitar che quellas vegnan tractadas fauss. En il mender cas pudess il post da surveglianza da datas er intervegnir.
Il post datti ussa dapi trais mais. La lavur ha dimena pir gist cumenzà ed i dat anc chaussas d'organisar e planisar.
Or da l'archiv: