La Partida Populara Svizra ha tschertgà il contact cun la populaziun. Uschia eran ils cussegliers federals Guy Parmelin ed Albert Rösti, il president da partida Marcel Dettling ed era ils cussegliers naziunals dal Grischun Roman Hug e Magdalena Martullo-Blocher èn stads da la partida amez Cuira per sentir il puls da la populaziun.
Tranter 100 e 150 persunas han prendì part – la gronda part commembers da la partida u simpatisants. Dentant èsi er stà da chattar in u l'auter «exot», sco per exempel in commember dal Center engiadinais ch'ha ditg envers RTR ch'ins prendia d'enconuscher in zic la glieud uschia. «Mo cler, igl è in event per far reclama per lur partida», manegia el.
-
Bild 1 von 3. Er il segund cusseglier federal da la PPS Albert Rösti è ì tranter la glieud. Bildquelle: MAD PPS.
-
Bild 2 von 3. Malgrà temperaturas fraidas èn 100-150 persunas stadas sperasvia tar l'occurrenza «SVP bi dä Lüüt». Bildquelle: MAD PPS.
-
Bild 3 von 3. Er la cussegliera naziunala e schefa da la Ems Chemie Magdalena Martullo-Blocher è stada preschenta a Cuira. Bildquelle: MAD PPS.
Cun musica, liongias giu dal gril e bavrondas han ils visitaders nizzegià l’occasiun per discurrer cun la glieud prominenta da la partida. Discurs uffizials u pleds sin ina tribuna n’hai betg dà. En il focus stat il barat direct.
Spezialmain da manaivel al pievel è il president da la Confederaziun Guy Parmelin sa mussà. Cun sia chapitscha d'enviern cun zocla, tratga sur las ureglias, è el stà nà per numerus selfies ed er per inqual discurs cun la glieud.
Quai èn buns contacts. Per mai è quai in plaschair.
Reclama en vista a las elecziuns en il Grischun
Cler n'ha la PPS betg organisà quest'occurrenza a Cuira senza motiv. L'inscunter «bi dä Lüüt» ha gì cleramain l'intenziun da far reclama. E che quai è gist stà a Cuira n'è nagina casualitad: en vista a las elecziuns dal parlament e da la regenza en il Grischun il zercladur, vai cunzunt per sustegnair la candidata per la regenza, Valérie Favre-Accola. Suenter 18 onns vul la PPS puspè turnar en la executiva dal chantun Grischun. «Nus essan ferms en il parlament chantunal, dentant ina persuna en la regenza mancà simplamain», di Marcel Dettling, president da la PPS Svizra.
La finamira è da fascinar cun nossas posiziun. E cler lain nus finalmain er dumagnar quest obstachel e far il pass en la regenza grischuna.
Per l'ina è l'inscunter sin la plazza Alexander amez Cuira stà in inscunter patgific cun gervosa, vin chaud ed ina liongia giu dal gril, per l'autra ha la saira er mussà che las partidas èn gia amez il cumbat electoral. Las elecziuns da la regenza e dal parlament grischun èn ils 14 da zercladur 2026.