La vicepresidenta da Tavau e presidenta dal Cussegl Grond, Valérie Favre Accola va en il cumbat electoral per la regenza grischuna. A la radunanza da la nominaziun han las commembras ed ils commembers da la PPS dal Grischun decis quai. Sco la partida aveva communitgà oravant steva er il president da la fracziun en il Cussegl Grond, Walter Grass (51) a disposiziun. Lez ha retschavì cun 50 cleramain damain vuschs che Favre Accola. Pir la saira da nominaziun è Hans Vetsch sa mess a disposiziun e survegnì trais vuschs.
Las vuschs en survista
- Valérie Favre Accola: 170 vuschs
- Walter Grass: 50 vuschs
- Hans Vetsch: 3 vuschs
Sco il pledader da la PPS Jann Thöny aveva ditg avant la radunanza da nominaziun envers RTR saja la strategia dad ir cun in ticket dad in, pia cun in candidat u ina candidata a las elecziuns 2026. Quella candidata è Valérie Favre Accola.
Valérie Favre Accola (*26-03-1973) è naschida a Fribourg e creschida sì a Tavau. Ella fa part da la Partida populara svizra ed è dapi l’onn 2018 deputada dal Cussegl grond. Dapi il cumenzament dal 2025 è ella vicepresidenta (commembra Kleiner Landrat) da la vischnanca da Tavau. Ella s'engascha per il svilup da la nova generaziun en il sport ed era per il svilup da las singulas vischnancas e regiuns en il Grischun.
Plinavant è ella actualmain presidenta dal Cussegl grond, en il parlament sesa ella dapi il 2018. Valérie Favre Accola è mamma da trais uffants.
Las elecziuns da la regenza èn ils 14 da zercladur 2026. D'occupar da nov è in sez, numnadamain quel dal cusseglier guvernativ Jon Domenic Parolini (AdC) che na candidescha betg pli pervi da limitaziun da l'uffizi. D'eleger u reeleger èn cusseglieras u cussegliers guvernativs per tut ils tschintg posts en la regenza grischuna.
Sper la regenza vegnan er elegids ed elegidas las 120 deputadas e deputads dal Cussegl grond. Là annunzia la PPS d'avair chattà gia 100 candidatas e candidats per las partidas regiunalas. La finamira saja però vinavant da candidar cun glistas plainas per mintga circuit electoral. Las nominaziuns per lezs sezs èn però en ils mauns da las partidas regiunalas.
Questas persunas van er anc en cursa per in sez en la regenza
Autras partidas grischunas han gia annunzià tgi che va en cursa per in sez en la regenza. ll Center ha actualmain trais sezs en l'executiva e vul er defender quels. Sper il cussegliers en uffizi Marcus Caduff e Carmelia Maissen ha la partida Aita Zanetti, presidenta communala da Scuol, sco terza candidata che duai defender il sez da Jon Domenic Parolini che vegn liber.
La Partida socialdemocratica ha annunzià che ses cusseglier guvernativ en uffizi Peter Peyer candidescha per ina ulteriura perioda d'uffizi. Sch'i dat anc ina segunda candidatura da la PS vegn actualmain anc discutà.
La medema situaziun sa preschenta tar la Partida liberaldemocratica dal Grischun. A disposiziun per in'ulteriura perioda stat il cusseglier guvernativ en uffizi Martin Bühler. Sch'i dat anc ina segunda candidatura decida la partida il schaner.
Plinavant ha la Partida verd-liberala grischuna nominà Nora Saratz Cazin uffizialmain sco candidata per la regenza grischuna. La presidenta communala da Puntraschigna candidescha per recaltgar l'emprim sez insumma per la Partida verd-liberala en la regenza grischuna.