La vicepresidenta da Tavau e presidenta dal Cussegl Grond, Valérie Favre Accola va en il cumbat electoral per la regenza grischuna. A la radunanza da nominaziun han las commembras ed ils commembers da la PPS dal Grischun decis quai. A disposiziun è er stà il president da fracziun en il Cussegl Grond, Walter Grass. Lez ha retschavì cun 50 cleramain damain vuschs che Favre Accola. Pir la saira da nominaziun è Hans Vetsch sa mess a disposiziun e survegnì trais vuschs.
Jau n'hai betg mo tremblà in pau, jau hai tremblà fitg. Jau era fitg gnervusa, ma jau hai ussa grond plaschair.
Las vuschs en survista
- Valérie Favre Accola: 170 vuschs
- Walter Grass: 50 vuschs
- Hans Vetsch: 3 vuschs
Radunanza da nominaziun da la PPS grischuna
-
Bild 1 von 7. Valérie Favre Accola retschaiva gratulaziuns per sia nominaziun sco candidata per la regenza grischuna. Ella ha survegnì 170 da 223 vuschs. Bildquelle: RTR.
-
Bild 2 von 7. La sala tar la radunanza da la PPS grischuna è plaina. Bildquelle: RTR.
-
Bild 3 von 7. L'entschatta da la saira è vegnida embellida cun musica populara. Bildquelle: RTR.
-
Bild 4 von 7. Il president da la partida Roman Hug maina tras la radunanza da la PPS grischuna. Bildquelle: RTR.
-
Bild 5 von 7. Valérie Favre Accola motivescha sia candidatura sin tribuna. Bildquelle: RTR.
-
Bild 6 von 7. Magdalena Martullo Blocher dat la vusch a Walter Grass. Bildquelle: RTR.
-
Bild 7 von 7. Walter Grass n'è betg il candidat da la PPS dal Grischun per la regenza chantunala. El ha fatg mo 50 da totalmain 223 vuschs. Bildquelle: RTR.
Durant la radunanza èn omadus candidats vegnì sustegnids cun votums. Ed era in terz candidat è semess a disposiziun spontanmain: Hans Vetsch. El aveva gia ina giada candidà adumbatten per la regenza grischuna il 2022 – lura dentant senza partida.
La suprastanza da la partida ed era Magdalena Martullo Blocher avevan proponì da dar la vusch a Walter Grass. I pareva ch'i dettia ina cursa testa a testa – ma il resultat è alura stà fitg cler.
Jau sun fitg cuntent. Jau crai ch'i saja sco president in grond privilegi d'astgar manar ina partida uschia che candidats valabels pon sa preschentar. Uss ha Valérie Favre Accola gudagnà: ella ha tut quai ch'i dovra per far politica en la regenza.
Sco il pledader da la PPS Jann Thöny aveva ditg avant la radunanza da nominaziun envers RTR saja la strategia dad ir cun in ticket dad in, pia cun in candidat u ina candidata a las elecziuns 2026. Quella candidata è pia Valérie Favre Accola.
Valérie Favre Accola (*26-03-1973) è naschida a Fribourg e creschida sì a Tavau. Ella fa part da la Partida populara svizra ed è dapi l’onn 2018 deputada dal Cussegl grond. Dapi il cumenzament dal 2025 è ella vicepresidenta (commembra Kleiner Landrat) da la vischnanca da Tavau. Ella s'engascha per il svilup da la nova generaziun en il sport ed era per il svilup da las singulas vischnancas e regiuns en il Grischun.
Plinavant è ella actualmain presidenta dal Cussegl grond, en il parlament sesa ella dapi il 2018. Valérie Favre Accola è mamma da trais uffants.
Las elecziuns da la regenza èn ils 14 da zercladur 2026. D'occupar da nov è in sez, numnadamain quel dal cusseglier guvernativ Jon Domenic Parolini (AdC) che na candidescha betg pli pervi da limitaziun da l'uffizi. D'eleger u reeleger èn cusseglieras u cussegliers guvernativs per tut ils tschintg posts en la regenza grischuna.
Rumpa Valérie Favre Accola ina lescha nunscritta?
I n'è betg in artitgel en in cudesch da lescha scrit nair sin alv. Dentant pari da dar in consens ch'il president u la presidenta dal Cussegl grond na candidescha betg per la regenza. Dentant è questa lescha nunscritta gia vegnida rutta intginas giadas en il passà:
- Leon Schlumpf è dal 1964 vegnì elegì sco president dal Cussegl grond ed il 1965 en la regenza.
- Tobias Kuoni è dal 1970 vegnì elegì sco president dal Cussegl grond ed il 1971 en la regenza.
- Otto Largiadèr è dal 1973 vegnì elegì sco president dal Cussegl grond ed il 1974 en la regenza.
- Luzi Bärtsch è dal 1985 vegnì elegì sco president dal Cussegl grond ed il 1986 en la regenza
Valérie Favre Accola è l’avust 2025 vegnida elegida sco presidenta dal Cussegl grond e candidescha era per las elecziuns per la regenza che han lieu l’entschatta stad 2026. Il pensum da quests dus posts sa cruscha betg cun quai che la plazza en la regenza surprendess ella plir ils 1.1.2027. Plitost sa cruschan il presidi ed il cumbat electoral. Valérie Favre Accola na vul betg far maldiever dal post sco pli auta grischuna sco plattafurma per il cumbat electoral.
Jau desist sin tut ils supplements da represchentanza e spesas ch’jau survegniss sco presidenta dal Cussegl grond.
La fairness saja pia dada, manegia Valérie Favre Accola. Ella haja bain ina pli gronda plattafurma che las candidatas novizas – en quest cas Nora Saratz-Cazin ed Aita Zanetti. Las persunas che sesan gia en la regenza hajan dentant exact la medema plattafurma.
Sper la regenza vegnan er elegids ed elegidas las 120 deputadas e deputads dal Cussegl grond. Là annunzia la PPS d'avair chattà gia 100 candidatas e candidats per las partidas regiunalas. La finamira saja però vinavant da candidar cun glistas plainas per mintga circuit electoral. Las nominaziuns per lezs sezs èn però en ils mauns da las partidas regiunalas.
Questas persunas van er anc en cursa per in sez en la regenza
Autras partidas grischunas han gia annunzià tgi che va en cursa per in sez en la regenza. ll Center ha actualmain trais sezs en l'executiva e vul er defender quels. Sper il cussegliers en uffizi Marcus Caduff e Carmelia Maissen ha la partida Aita Zanetti, presidenta communala da Scuol, sco terza candidata che duai defender il sez da Jon Domenic Parolini che vegn liber.
La Partida socialdemocratica ha annunzià che ses cusseglier guvernativ en uffizi Peter Peyer candidescha per ina ulteriura perioda d'uffizi. Sch'i dat anc ina segunda candidatura da la PS vegn actualmain anc discutà.
La medema situaziun sa preschenta tar la Partida liberaldemocratica dal Grischun. A disposiziun per in'ulteriura perioda stat il cusseglier guvernativ en uffizi Martin Bühler. Sch'i dat anc ina segunda candidatura decida la partida il schaner.
Plinavant ha la Partida verd-liberala grischuna nominà Nora Saratz Cazin uffizialmain sco candidata per la regenza grischuna. La presidenta communala da Puntraschigna candidescha per recaltgar l'emprim sez insumma per la Partida verd-liberala en la regenza grischuna.