Situaziun da partenza tar la regenza
Actualmain sa cumpona la regenza grischuna da suandontas persunas:
- Jon Domenic Parolini (Il Center) elegì il 2014
- Peter Peyer (Partida socialdemocratica) elegì il 2018
- Marcus Caduff (Il Center) elegì il 2018
- Martin Bühler (Partida liberaldemocratica) elegì il 2022
- Carmelia Maissen (Il Center) elegida il 2022
Cler è che Jon Domenic Parolini (Center) sto chalar pervi da la limitaziun dal temp d'uffizi. El è gia vegnì reelegì duas giadas e na po betg vegnir elegì ina terza giada. Tut tschels pon anc ir en ina, u schizunt duas proximas rundas. Peter Peyer (PS) è gia vegnì nominà uffizialmain da sia partida. Sch'i dat anc ina segunda candidatura da la PS vegn actualmain anc discutà.
Er ditg ch'el candideschia per in'ulteriura perioda d'uffizi ha Martin Bühler da la Partida liberaldemocratica. Sch'i dat anc ina segunda candidatura vul la partida decider il schaner, hai num sin dumonda da RTR.
Er il Center vul ir cun ils dus cussegliers guvernativs en uffizi en cursa Carmelia Maissen e Marcus Caduff sco er defender lur terz sez. Quai vulan els fan cun Aita Zanetti, presidenta communala da Scuol e deputada dal Cussegl grond.
Tgi attatga il sez dal Center?
Anc ha Il Center pia la maioritad en la regenza e po cumandar las festas, quai duai dentant sa midar sch'i va tenor las autras partidas. Perquai è er ina da las pitschnas gia sa messa en posiziun: La Partida verd-liberala (PVL) va en la cursa cun Nora Saratz Cazin. La presidenta communala da Puntraschigna è deputada en il Cussegl grond e part da la suprastanza da la partida. La partida ha nominà ella ils 10 da zercladur sco candidata uffiziala per la regenza.
Er la Partida populara (PPS) emprova in'ulteriura giada da recaltgar in sez en la regenza. Questa giada va en cursa la vicepresidenta da Tavau e presidenta dal Cussegl grond Valérie Favre Accola. Ils commembers e las commembras da la partida han preferì Favre Accola per il ticket da la regenza enstagl dal deputà Walter Grass.
Er il parlament vegn elegì
Sper la regenza elegia il suveran grischun il zercladur 2026 er ils 120 deputads e deputadas che duain seser en il Cussegl grond, pia il parlament dal chantun Grischun. Per la segunda giada succeda l'elecziun cun il proporz dubel, l'emprima giada hai dà cun quest sistem elecziuns il 2022. Da la midada dal maiorz sin il proporz dubel avevan cunzunt las partidas da pol pudì profitar; la PS aveva augmentà ses mandats da 18 sin 27, la PPS aveva fatg in sigl da 9 sin 25 sezs en il parlament. Per il 2026 sa tschenta la dumonda sche questas duas partidas vegnan da tegnair quest dumber da sezs. Malgrà che l'Allianza dal Center aveva stuì laschar plimas il 2022 cun il proporz dubel, è ella cun 34 mandats anc adina la ferma partida en il parlament grischun.