La Partida verd-liberala grischuna ha nominà Nora Saratz Cazin uffizialmain sco candidata per la regenza grischuna – quai a chaschun d'ina radunanza dals commembers e commembras. Actualmain è la politicra da 43 onns presidenta da fracziun verd-liberala en il Cussegl grond e presidenta communala da Puntraschigna.
Cun Nora Saratz Cazin vegnia ina politicra cun experientscha e buns contacts nominada per la regenza, scriva la partida en sia communicaziun.
Jau candidesch per la regenza perquai che jau vi gidar a concepir quai che quinta damaun.
Uschia vegn ella citada en la communicaziun. Concret saja quai: «il spazi d'abitar; ina furmaziun che lascha sviluppar talents; in'economia cun pliras chommas purtantas; in turissem ch'entusiasmescha l'entir onn; in bun provediment da sanadad ch'assicurads e las vischnancas pon sa prestar ed in chantun multifar che chapescha sia cultura e sia plurilinguitad sco instituziuns da l'identitad e sco impuls».
Nora Saratz Cazin candidescha per l'emprim sez da la Partida verd-liberala en la regenza grischuna. L'ultima giada aveva la partida preschentà ina candidatura il 2014. Da lez temp aveva Jürg Kappeler candidà, n'è dentant betg vegnì elegì.
Nora Saratz Cazin (*27-09-1981) è giurista e presidenta communala da Puntraschigna dapi il 2021. Ella è commembra e suprastanta da la Partida verd-liberala dal Grischun e dapi il 2022 era deputada en il Cussegl grond. La mamma da trais uffants è era stada presidenta da la cumissiun da gestiun communala da Puntraschigna (2017-2020) e commembra da la suprastanza da l'Uniun da commerzi e mastergn da Puntraschigna (2015-2020).
Nora Saratz Cazin è s'engaschada tranter auter per la situaziun d'abitar en la vischnanca da Puntraschigna, per exempel cun l'idea d'ina taglia per abitaziuns secundaras. Ses tema cumpiglian però era la promoziun da la cultura e la scola. Tranter auter en la suprastanza da l'Uniun da fauturs Pro Origen, en il cussegl da fundaziun da la IKG Kulturforschung Graubünden, en la suprastanza da l'Uniun patrimoni mundial RhB ed era sco presidenta da l'Associaziun dals cussegls da scola dal Grischun.
In sez vegn en mintga cas liber: quel da Jon Domenic Parolini (Partida dal Center) ch'ha cuntanschì la limita dal temp d'uffizi. Parolini era vegnì elegì il 2014 en la regenza, ed è gia vegnì reelegì duas giadas. Tut tschels cussegliers e cusseglieras guvernativas pon anc ir en ina, u schizunt duas rundas supplementaras.
Per la partida da Jon Domenic Parolini, il Center dal Grischun, na vegnia dentant betg en dumonda da surdar il sez da la regenza simplamain uschia als verd-liberals. Sco Kevin Brunold ha ditg envers RTR hajan ins ils proxims mais da guardar co far il cumbat electoral.
La candidatura da Nora Saratz Cazin na recepin nus betg sco attatga cunter nossa partida.
Il president da la partida di plinavant che Il Center vegnia segiramain a candidar per l'elecziun da l'onn proxim. Tge persunas che duain dentant represchentar Il Center en la regenza na saja fin uss dentant anc betg definì.
Sper la regenza elegia il suveran grischun ils 14 da zercladur 2026 er ils 120 deputads e deputadas che duain seser en il Cussegl grond, pia il parlament dal chantun Grischun.
Or da l'archiv: