En var quatter mais vegn elegida la regenza grischuna. Quatter da las tschintg persunas d'enfin uss candideschan danovamain – pia Martin Bühler, Carmelia Maissen, Marcus Caduff ed il socialdemocrat Peter Peyer. Che Peyer vegn a defender ses sezs è enconuschent dapi l'avrigl da l'onn passà. Ditg ha dentant er ina segunda candidatura dà da discutar en la partida sanestra. Durant ina radunanza da delegada extraordinaria l'entschatta da favrer è lura sa mussà: Peter Peyer candidescha sulet per la PS Grischuna.
Interess, dentant betg per tuta forza
Sco che la presidenta da la PS Grischuna, Julia Müller, ha ditg envers RTR, fiss la partida gugent ì cun ina segunda persuna en la cursa. Ideal fiss stà ina dunna. I dettia er persunas entaifer la partida ch'hajan da principi interess, dentant nagina che veglia exnum candidar gia quest onn.
Plinavant na quinta la PS betg d'avair schanzas realisticas sin in segund sez en la regenza. Gia uss saja Peyer la suletta persuna d'ina partida betg-burgaisa en la regenza. Lura na fetschia betg segn da sfarlattar in'ulteriura persuna e resursas. Plinavant fetschia Peter Peyer buna lavur, uschia ch'ins veglia sustegnair el plainamain.
Peyer vul restar en uffizi – sia motivaziun è clera
Unanimamain e cun ferm applaus è Peter Peyer vegnì nominà uffizialmain al di da partida da la PS grischuna la primavaira 2025 a Claustra. El haja ina experientscha da sis onns e cun questa experientscha e l’agid d'in bun team saja el persvadì da pudair prender a mauns las sfidas che stettian ils proxims onns sin l’agenda, uschia Peter Peyer.
Jau ma sent fit e saun e la lavur fa grond plaschair. Perquai ves jau nagin motiv da na betg candidar.
Cler, patratgs da chalar haja er dà, conceda il socialdemocrat. Cunzunt sch'i na giaja betg per la discussiun politica mabain per attatgas persunalas. Cunter questa tendenza negativa lessi el cumbatter.
Nov program da partida suenter 15 onns
Finalmain è el qua – il nov program da partida. 15 onns haja ussa cuzzà enfin che la versiun finala dal nov program è vegnì preschentà als commembers e las commembras da la partida. Quai saja stà in lung process nua che divers gremis han fatg part. Era anc durant il di da partida a Claustra hai dà discussiuns. Aifer la partida dentant era cun la «sora pitschna», la JUSO. In punct ch'ha dà cumbats saja per exempel la mobilitad. Il giuvens socialdemocrats pretenda in traffic public gratuit per tuttas e tuts. Quai ha il di da la partida approvà. Dentant relativescha Julia Müller, presidenta da la PS grischuna.
Mintgatant dastgan ins era plazzar insatge en il program da partida che n'è betg dal tut realistic. Impurtant è che nus giain en questa direcziun.
Il traffic public è mo ina da 13 parts da las finamiras da quest nov program. Il da partida ha era fixà ulteriuras finamiras sco per exempel, spazi da viver pajabel ubain la capacitad da cumpra. En general stetti il program sut il motto: ina buna vita per tuttas e tuts.