En il rom da la radunanza da delegads e delegadas ha la partida liberaldemocratica nominà ses candidats per la regenza. Gia pli ditg eri cler che Martin Bühler - ch’è dapi il 2023 en l’executiva - candidescha puspè.
La testa da la partida haja alura decidì dad ir en la cursa cun duas persunas, e nominà Maurizio Michael. Unanimamain han ils delegads e las delegadas sustegnì questa candidatura. L'um da Castasegna, il vitg en la vischnanca da Bregaglia, è gia dapi il 2010 en il Cussegl grond. Dapi il 2024 è el il president da la PLD grischuna.
Igl è temp ch’il Grischun da la lingua taliana è puspè represchentà en la regenza grischuna... Ins vesa adina puspè ch’ins na chapescha betg adina nus. I dovra insatgi ch'enconuscha bain las vals.
Questas persunas van er anc en cursa
Sper Maurizio Michael datti trais ulteriuras candidatas che cumbattan per il sez che daventa liber – perquai che Jon Domenic Parolini ha cuntanschì la limitaziun dal temp d’uffizi. La Partida verd-liberala grischuna ha nominà Nora Saratz Cazin uffizialmain sco candidata per la regenza grischuna. Per il Center candidescha Aita Zanetti, la presidenta communala da Scuol per il sez. E Valérie Favre Accola è la candidata da la Partida populara dal Grischun.