La partida dal Center vul defender ses trais sezs en la regenza grischuna. Sper Marcus Caduff e Carmelia Maissen ha la partida dal Center preschentà la meseemna sia terza candidata a chaschun d'ina conferenza da medias. Aita Zanetti, presidenta communala da Scuol, duai defender il terz sez da la partida.
Aita Zanetti saja ina intermediatura versada or dal Grischun dal Sid, scriva la partida en la communicaziun. Il cusseglier guvernativ actual Jon Domenic Parolini na po betg pli candidar, cunquai ch'el ha la fin dal 2026 cuntanschì la limita dal temp d'uffizi da 12 onns.
Aita Zanetti (*1970) abita a Sent, è pura e mamma da 4 uffants. Dapi il 2023 è ella era presidenta communala da Scuol. Dapi il 2018 è ella deputada en il Cussegl grond per il circul da Suot Tasna. Il 2021 è ella stada la «pli auta Grischuna» sco presidenta dal Cussegl grond. Là è ella en la cumissiun per sanadad e socialesser.
Dasper ses uffizis politics è Aita Zanetti era vicepresidenta dal Center da sanadad Engiadina Bassa, en la suprastanza da la Corporaziun Energia Engiadina, commembra dal Cussegl da la Scol'auta da pedagogia dal Grischun e commembra da la cumissiun federala dal Parc Naziunal.
Las elecziuns han lieu ils 14 da zercladur 2026. Sper ina nova regenza, vegnan er elegids las deputadas ed ils deputads dal Cussegl grond.
Questas persunas van er anc en cursa
Sper la partida dal Center ha era la Partida socialdemocratica gia annunzià da vulair ir en cursa cun il cusseglier guvernativ en uffizi Peter Peyer. Sco quai che la partida ha ditg envers RTR na saja actualmain betg previs ina segunda candidata u candidat.
Plinavant ha la Partida verd-liberala grischuna nominà Nora Saratz Cazin uffizialmain sco candidata per la regenza grischuna. La presidenta communala da Puntraschigna candidescha per recaltgar l'emprim sez insumma per la Partida verd-liberala en la regenza grischuna. L'ultima giada aveva la partida preschentà ina candidatura il 2014. Da lez temp aveva Jürg Kappeler candidà, n'è dentant betg vegnì elegì.
Era da la Partida populara dal Grischun datti duas candidaturas. La partida propona Valérie Favre Accola (52) da Tavau e Walter Grass (51) dad Urmein a la radunanza da nominaziun per las elecziuns da la regenza. Sco quai che la PPS communitgescha, pon ulteriurs interessents anc s'annunziar enfin la radunanza dals 4 da december.