Igl è in’emna avant il Laax Open: Ils ultims razs da sulai cuvran l’ufficina dals «shapers», paucs pass sut il Crap Sogn Gion, en ina glisch cotschna. Ils «shapers», quai èn quellas persunas che fabritgan e mantegnan il Snow Park Laax.
Cun maschinas da far pista e palas creescha la squadra schanzas, halfpipes ed obstachels da tuttas furmas. Igl è las quatter la saira, sesent enturn in computer planisescha la squadra las lavurs da la notg.
Il servezzan cumenza
-
Bild 1 von 3. La maschinista ed ils maschinists planiseschan las lavurs. En l'ufficina datiers il Crap Sogn Gion cumenza mintgamai il servetsch. Bildquelle: RTR.
-
Bild 2 von 3. La «Pro Line» – il percus dal Laax Open è anc en lavur. Dus sets da «rails» e trais schanzas marcheschan il percurs. Bildquelle: RTR.
-
Bild 3 von 3. Las maschinas da far pista èn prontas per il servezzan. La squadra dal Snow Park Laax ed ina part da la squadra da far pista parta la garascha tar il Crap Sogn Gion. Bildquelle: RTR.
Trais maschinists, ina maschinista ed in maun plain shapers èn en acziun questa notg. Il pli grond problem, paucs dis avant ch’il trenament per il Laax Open cumenza, è la mancanza da naiv, declera Ann-Sofie Sandström, maschinista da 26 onns da la Finlanda.
Normalmain èn quests parcs tuts gia pronts e nus ans pudain concentrar sin il percurs dal Laax Open. Quest onn avain nus preparà tut parallel en stgars in’emna.
Ils chanuns da naiv van di e notg e tuttina hai lieus cun be 30 centimeters naiv. Ina sfida per fabritgar in percurs d’elita.
Sin il Crap Sogn Gion regna travasch. In helicopter rotescha al tschiel rosa cun material da la val fertant che las maschinas da far pista sa mettan sin viadi en direcziun parc. Ann-Sofie Sandström è responsabla per ils trais sigls gronds dal percurs d’elita. Sigls, ch'èn uschè auts sco pitschnas chasas, cun lunghezzas d'enfin passa 20 meters.
Jau di adina, ch'ins sto savair siglir quai ch'ins fabritga.
La maschinista charezza cunzunt da fabritgar ils sigls gronds e declera ch’i gida dad avair in sentiment sco in sigl sto esser cun far el. Da testar per l’emprima giada l’agen obstachel saja adina inquietant, conceda la skiunza, i saja dentant in sentiment incredibel. Impurtant sajan per ina buna schanza angul, radius, otezza e segirezza.
La notg tar maschinistas e shapers
-
Bild 1 von 6. Ann-Sofie Sandström . Durant la stad è la maschinista finlandaisa mecanista per las maschinas da far pista. Bildquelle: RTR.
-
Bild 2 von 6. Joel Hasler (dretg) cun in shaper . Il maschinist prepara la basa, ils shapers fineschan ils obstaculs cun pala e resgia a motor. Bildquelle: RTR.
-
Bild 3 von 6. Per il Laax Open duai tut esser exact. La concurrenza vegn emessa en la televisiun, ils puncts culminants vegnan derasads via medias sozialas. Il parc haja da defender ina reputaziun. Bildquelle: RTR.
-
Bild 4 von 6. Gist sut la staziun Crap Sogn Gion cumenza il percurs. L'emprim obstacul è anc en lavur. Il maschinist ed ils shapers coordineschan. Bildquelle: RTR.
-
Bild 5 von 6. Joel Hasler en la maschina da far pista. Sper il percurs dal Laax Open sto Joel Hasler questa notg anc preparar il «P60 Parc». Bildquelle: RTR.
-
Bild 6 von 6. La notg sin il Crap Sogn Gion. Il servezzan dura da las 16:00 enfin il pli tard las 3:00 la bunura. Suenter vai sin skis ed aisa e cun lampa da frunt engiu. Bildquelle: RTR.
Var 100 meters plinensi è Joel Hasler ad optimar l’emprim obstachel dal percurs dal Laax Open. In set da rails, pia stangas da fier ch’empermettan ina variaziun da trics. En coordinaziun cun ils shapers cun pala vegn l’obstachel perfecziunà. Il Snow Park Laax, che gauda in renum internaziunal haja da defender ina reputaziun.
Il Laax Open vegn emess en la televisiun, ils highlights vegnan derasads en las medias socialas. Tut sto vesair or perfect
Naiv restanta vegn stumplada davent, las cantas da las schanzas vegnan tagliadas cun resgias a motor ed il percurs vegn cun agid da GPS mess en simmetria perfetga. Il parc saja sco in placat per il territori da skis.
Ina professiun dals siemis
Il servetsch da notg cumenza per maschinistas e maschinist las quatter la saira e finescha il pli tard las trais la damaun. 6 dis lavur, 3 dis liber, paucas fin d’emnas liber. La paja na saja betg in motiv per far la lavur, i dovra passiun. E quella ves’ins en ils egls da Joel Hasler ed Ann-Sofie Sandström, che na vulessan mai barattar cun insatgi.
Igl è sco ina sablunera surdimensiunada cun maschinas grondas. Jau lavur sin la muntogna cun la meglra vista e poss crear rauba.
Schebain ch'ins sesa l'entira notg sulet en la maschina saja la professiun ina dals siemis. Ed il punct culminant suenter il servetsch? Cun lampa da frunt, skis u aissa sur pista frestga vers saira sontga.