Snowboard slopestyle
Il Franzos Romain Allemand gudogna a Laax per l'emprima giada en sia carriera ina concurrenza da la cuppa mundiala da slopestyle. A ses ferm emprim percurs (86,70 puncts) s'avischina mo Yuto Kimura (JPN) cun 81,70 puncts che daventa segunda avant Yiming Su (CHN).
Il Svizzer Jonas Hasler mussa dus percurs solids, dentant betg fitg ferms, quai che tanscha ad el per rang 6. In resultat solid per il giuven da 19 onns.
Tar las dunnas è la Giapunaisa Kokomo Murase siglida sisum sin il podest. Segunda è l'Americana Lily Dhawornvej avant l'Austriaca Anna Gasser. Svizras n'èn stadas naginas en il final.
Halfpipe snowboard: Asia da l'Ost e Down Under domineschan
En il final da snowboard en la halfpipe va Gaon Choi da la Corea cun 92,50 puncts sisum dal podest. Segundas èn la Giapunaisa Rise Cudo e Xuetong Cai da la China.
Tar ils umens è l'Australian Scotty James cun in percurs prest perfetg (98,75 puncts) siglì sin il stgalim pli aut dal podest, quai avant Campbell Melville Ives da la Nova Zelanda e Valentino Guseli da l'Australia.
Scotty James ha uschia gudagnà trais giadas en seria e la 5avla giada insumma il Laax Open.
Er siglì en la halfpipe è Patrick Burgener che va dapi questa stagiun sut la bandiera brasiliana. En il classament final sa tschenta il burgais svizzer-brasilian sin il sisavel rang.
Slopestyle freeski: Ragettli e Gremaud sper il podest
Ils represchentants svizzers manchentan ina plazza da podest al Laax Open. En il slopestyle resulta per Mathilde Gremaud e d Andri Ragettli mintgamai rang 7.
Per la victoria è ì Birk Ruud (85,08 puncts). Il Norvegiais ha gì exact in punct dapli sin il conto che l'Austriac Matej Svancer. Terz è daventà il Canadais Evan Mceachran.
Tar las dunnas ha gudagnà la topfavurita chinaisa Eileen Gu (85,13 puncts) avant l'Americana Marin Hamil e Lara Wolf da l'Austria.
In star davant culissa locala
Andri Ragettli è in dals gronds stars e favurits al Laax Open. Igl è la concurrenza da chasa, a Crap Sogn Gion nua ch'el ha fatg ses emprims sigls e trics.
Il 2023 ha il skiunz da freestyle da 27 onns gia gudagnà ina giada la concurrenza a Laax. Deplorablamain n'èsi betg reussì a Ragettli da repeter quest success. Oravant ha el ditg ch'el veglia cun ina victoria a Laax lura ir cun in bun sentiment als X-Games la fin schaner ad Aspen ed als gieus olimpics il favrer a Livigno. Ina medaglia olimpica è il sulet che manca anc en ses palmarès.
Sper il program sportiv sin il Crap Sogn Gion hai er dà acts musicals en il vitg a Laax Murschetg.