Giulia Tanno vala sco ina da las meglras skiunzas svizras da freestyle. Mo sia carriera è er savens vegnida franada da blessuras. Al Laax Open po la Grischuna da 25 onns però finalmain puspè ir ina giada a la partenza cun in bun sentiment e cun ina buna furma. Dapi bun in onn e mez ha ella numnadamain pudì trenar senza problems da sanadad.
La nova stagiun ha cumenzà bain
En questa stagiun è Giulia Tanno sa participada a quatter concurrenzas da la cuppa mundiala, trais giadas en il big air e la fin november a Stubai en l’Austria en il slopestyle. En tut questas cursas è ella sa classada sut las top 7. Ina sumegliant buna prestaziun vul ella uss er mussar a la cuppa mundiala da chasa, avant ses agens fans.
Giulia Tanno è cun ses 25 onns gia ina da las pli rutinadas al Laax Open. Dapi 10 onns parta ella gia en la cuppa mundiala. Durant questa decada ha la skiunza da Lai er emprendì d’enconuscher omaduas varts da la medaglia. Gist nov giadas è ella stada blessada. Tranter auter ha ella gì rut l’oss-clavigl, il meniscus, il garlet, in bratsch, la spatla sco er il liom cruschà.
La sanadad è pli impurtanta ch’ils resultats
Pervia da blessuras ha Giulia Tanno da Lai er manchentà duas giadas ils gieus olimpics, quels da Pyeongchang il 2018 sco er quels da Peking il 2022. Per ella è quai stà ina dira frida. Malgrà ch’ella ha emprendì che resultats e gieus olimpics n’èn betg tut en la vita, spera ella tuttina anc da pudair ir ina giada a la partenza a gieus olimpics. La proxima schanza suonda il 2026 a Milaun e Cortina d’Ampezzo en l’Italia.
Mo er senza gieus olimpics, cun 14 plazzas da podest en la cuppa mundiala, da quai duas victorias en il big air, quatter medaglias als X-Games e duas cullas da cristal sco meglra atleta da la stagiun en la disciplina big air vala Giulia Tanno sco ina da las meglras skiunzas da freeski insumma en Svizra.
