Il 2023 tar la premiera ha era gist il mattadur local triumfà en il slopestyle, Andri Ragettli da Flem.
Dasper il grond star e favurit Andri Ragettli vulan er ils dus frars engiadinais, Nicola e Gian Andri Bolinger, procurar per ina gronda show en la concurrenza da slopestyle. Nicola ch’ha 21 onns e ch'è uschia dus onns pli vegls che Gian Andri era gia sa participà l’onn passà al Laax Open, quai dentant senza grond success.
Quai è fitg spezial d’astgar sa participar al Laax Open, er perquai che Laax è il mecca da la scena da freeski e snowboard. Quai vegn franc ina gronda show.
Nicola è quel ch’ha fullà in zic la via per Gian Andri ch’ha adina pudì profitar dal frar grond. Ma el possia franc er emprender da ses frar giuven, cunzunt dad esser relaxà e da betg ponderar uschè bler, mabain simplamain far, uschia Nicola Bolinger.
Nus n’avain nagina concurrenza, mabain essan ils megliers amis e sperain mo il meglier per l’auter.
La stagiun passada ha Gian Andri Bolinger gudagnà il classament general da la cuppa d’Europa da freeski (slopestyle e big air), quai avant ses frar Nicola. Cunquai ha Gian Andri er pudì far il pass en il cader A da Swiss Ski. Nicola fa vinavant part al cader Challenger.
Grondas finamiras per l’avegnir han omadus. Els siemian da victorias en la cuppa mundiala, da medaglias olimpicas e triumfs als X-Games, la pli gronda e spectaculara concurrenza en questa scena. Cun auters pleds, il giavisch è da daventar ina giada uschè ferms sco il collega d’equipa Andri Ragettli.
D’Andri Raggetli pudain nus emprender bler. El è ina maschina, er mental, e franc in idol.
Ils Grischuns al Laax Open 2024:
- Mona Danuser, Flem (snowboard slopestyle)
- Jeremy Denda, Silvaplauna (snowboard slopestyle)
- Giulia Tanno, Lai (freeski slopestyle)
- Andri Ragettli, Flem (freeski slopestyle)
- Kim Gubser, Tavau (freeski slopestyle)
- Fadri Rhyner, Flem (freeski slopestyle)
- Gian Andri Bolinger, Zuoz (freeski slopestyle)
- Nicola Bolinger, Zuoz (freeski slopestyle)
Betg a la partenza è Moritz Boll. Il snowboardist da 23 onns da Tavau è cupitgà en il trenament e stgarpà il liom cruschà. Boll è gia vegnì operà, po dentant betg pli ir a la partenza en questa stagiun, quai tenor Swiss Ski.
