lls proxims quatter onns vegnian tut auter che lungurus per il nov president da la citad da Cuira, Hans Martin Meuli. El e ses collegas en suprastanza, Patrik Degiacomi e Simon Gredig, spetgan intginas sfidas. Saja quai per exempel la construcziun da la nova pendiculara da Brambrüesch, crear abitaziuns attractivas e pajablas ni e cumbatter la problematica da drogas cun in nov local da consum. E quai èn mo trais sfidas da bleras.
Ina gronda sfida è er da correspunder a las aspectativas da la populaziun.
Hans Martin Meuli che vegn a surpigliar il departament da finanzas, economia e segirezza, cumenza sia nova lezia cun grond plaschair ed e cun in saun respect. El saja bain preparà, co el menziuna.
Surdada e preparaziun avant l'onn nov
Sa legids en ils dossiers na sajan ins betg dad oz sin damaun. Perquai ha Hans Martin Meuli gia cumenzà il 2024 a sa fatschentar cun tscherts temas. Avantatg sajan er ses 13 onns en il cussegl communal da la citad nua ch'el haja accumpagnà inqual fatschenta e dossier da Cuira. Sper quai haja ses antecessur Urs Marti surdà tut las pendenzas ed el possia surpigliar in manaschi cun ina buna organisaziun e collavuraturas e collavuraturs engaschads. Quai dettia motivaziun da cumenzar la nova sfida sco president da la citad da Cuira, di Meuli.
Hans Martin Meuli ha surpiglà il presidi da Cuira da ses collega da partida liberaldemocrat Urs Marti. La cursa per il post cunter Patrik Degiacomi dals socialdemocrats era stada fitg stretga cun la megliera fin per Meuli.