La situaziun en il vitget vallesan Blatten s'intensivescha. Entant èn gia bun dus terzs da la crappa instabila da la flanca ost dal grip crudada giu – part da quella è sa tschentada sin il glatscher «Birchgletscher» al pe dal «Kleines Nesthorn».
La paisa da quella glera fa ch'il glatscher sa mova adina pli spert en direcziun val. Tenor las calculaziuns actualas sa mova quel gia cun ina spertadad da radund dus fin dus e mez meters a di a val.
Cunquai resta pia vinavant il privel ch'il glatscher rumpa giu, vegn a val e tutga il vitg da Blatten.
Dus scenaris èn pussaivels
En il meglier cas rumpa be la part davant dal glatscher giu, e betg l'entir glatscher. Uschia avess il vitget Blatten tenor las autoritads vallesanas probablamain cletg e restass per gronda part intact. Il material che vegniss tar quest scenari a val tutgass numnadamain be ina zona limitada.
Tenor las autoritads è dentant er in auter, bler pli disfavuraivel scenari pussibel: Sche la paisa sin il glatscher crescha vinavant pervia da la glera e l'entir glatscher sa schlia, dessi pli probabel in'enorma bova da glitta. Quella avess consequenzas desastrusas per il vitg vallesan. I fiss da quintar cun donns da gronda dimensiun tar quest scenari.