Dapi la notg sin glindesdi hai dà tenor l'Institut per la perscrutaziun da naiv e lavinas (SLF) enfin 60 cm naiv sin las muntognas grischunas. Questa naiv procura per in privel da lavinas sin stgalim 4 da 5 – vul dir in privel grond. Betg mo las grondas massas naiv èn la raschun per il privel grond. Mabain era la vetta da naiv veglia. Tras las temperaturas fraidas e la pauca precipitaziun da l'ultim temp è la naiv veglia sa transfurmada e n'è betg pli ferma avunda per tegnair ensemen tut la naiv nova.
Impurtant è da s'infurmar sur dal privel da lavinas, sch'ins vul ir en la naiv.
La situaziun resta per ils proxims dis tendida. Surtut en il nord dal chantun ed en las alps glarunaisas. En il sid pudess la situaziun sa calmar pli svelt, perquai ch'ins quinta cun pli pauca naiv. Blera naiv fiss però era in avantatg. Sch'i dat vinavant blera naiv, pudess quella sutterar la naiv veglia ch'è instabila e quatras sa calmess era il privel da lavinas.
Quai però pir en in pèr dis. Tuttina il privel da lavinas è grond, giudair l'enviern possian ins lura tuttina tenor Benjamin Zweifel dal SLF. Las pistas e loipas sajan adina controlladas e vegnian serradas, sch'il privel sin las spundas pertutgadas saja memia grond.
Or da l'archiv:
