A Cuira cumenza a partir da quest glindesdi l’exposiziun publica dal project «Access Rosenhügel» sin la Via dal Güglia. Quest project ha la finamira da reorganisar il traffic en ed or da la citad da Cuira, sco era da distgargiar a moda persistenta la Kasernenstrasse.
Las lavurs da construcziun duajan cumenzar l'onn 2028 e cuzzar trais enfin quatter onns. Tut en tut custia il project bunamain 19 milliuns francs. La Confederaziun sa participescha a quests custs cun totalmain 3,7 milliuns francs. Il chantun surpiglia 8 milliuns e la citad da Cuira 7 milliuns francs.
Nus avain gia la via da sviament sid, ma actualmain na po quella betg vegnir duvrada sco access a Cuira perquai ch’ins na po betg sviar tar il Rosenhügel a sanestra envers la citad.
L'idea da promover pli ferm il sviament sid per arrivar en il center da Cuira existia gia dapi ils onns 1990. Dapi lura sajan, tenor il schef da construcziun da vias dal chantun, René Simeon, vegnids examinads 10 fin 15 projects.
Rosenhügel sco punct central da traffic
L'access existent Rosenhügel duai daventar in punct central da traffic grazia ad ina nova cruschada cun ampla da traffic. Il traffic ch'arriva da l'autostrada Cuira sid duai vegnir manà sur la Via da Mailx e l'Obertor directamain en direcziun dal center da la citad, senza stuair prender la ruta via la Kasernenstrasse e tras il Welschdörfli.
Per realisar il nov access èn planisadas pliras midadas:
- La cruschada al Rosenhügel duai survegnir in sistem d'amplas da traffic.
- A la cruschada Sommerau duai en futur dar dus vials direcziun Rosenhügel e mo pli in vial che maina en il center da la citad sur la Kasernenstrasse.
- Il sviament sid sur la Julierstrasse duai vegnir schlargià a partir da la cruschada Sommerau. Là duai era dar ina paraid da protecziun cunter canera. En pli è previs in vial da radund 150 meters per sviar a sanestra vers la citad da Cuira.
- Era la Via da Malix duai vegnir schlargiada. Quai duai il medem mument era vegnir dabun als ciclists e las ciclistas, perquai ch'igl haja uschia spazi per ina strivla da velo vers engiu senza interrupziun.
- A la rundella da l'Obertor duain vegnir adattadas las reglas da precedenza. Da nov duai il traffic ch'arriva sur la Via da Malix a Cuira avair il dretg da precedenza, e betg pli – sco fin ussa – il traffic che vegn tras il Welschdörfli.
Il chantun ed era la citad èn persvadids che las vias da Cuira pon vegnir distgargiadas grazia a quest project. Al Rosenhügel vegnia numnadamain ensemen bler traffic: quel da Cuira, quel che vul ir a Cuira e quel ch'arriva giu da Lai. Tenor ils models duai il nov access meglierar la situaziun da traffic. Co quai funcziuna vesan ins dentant pir il 2031.