A Cuira devi radund 40 persunas senza tetg il schaner 2024 – pertutgadas èn cunzunt persunas dependentas da drogas cun cundiziuns d'abitar irregularas. Per reducir quest dumber en il Grischun vul la regenza stgaffir spazi d’abitar per persunas dependentas. Perquai ha ella uss concedì ina contribuziun chantunala da bun 198'000 francs al project «Housing First».
Lantschà quest project ha l’uniun «Oase». Durant la fasa da pilot – che cumenza a partir da l'avust – metta il project a disposiziun ina purschida da basa per tschintg persunas.
«Igl è temp d'agir» ha la regenza communitgà l'entschatta 2024. Dapi l'onn passà saja il dumber da las persunas senza tetg sa dublegià en la chapitala grischuna. Avair in tetg sur il chau, quai duai grazia a «Housing First» er esser pussaivel per quels e quellas che n'han betg ina schanza realistica sin in'abitaziun. Concretamain vegn mess a disposiziun als pertutgads ed a las pertutgadas localitads u chombras nua che quels pon abitar. Persunas che fan diever da «Housing first» vivan autonom. Ellas ston sa tegnair vi da las cundiziuns da locaziun usitadas, survegnan dentant sustegn medicinal e psichiatric.
Ils davos onns han bleras persunas pers lur abitaziun. Nus vulain ussa dar cuntrapais a quest svilup.
Sustegn psicologic uss er en il dachasa
Plinavant ha la regenza approvà in’ulteriura incarica da prestaziun. Quella sa drizza a persunas cun ina malsogna psichica acuta che basegnan temporar sustegn pli intensiv.
L'idea è da che questas persunas survegnan da nov sustegn psicologic – sche necessari pliras giadas a di – en ses dachasa. Uschia vulan ins tenor la regenza remplazzar ils tractaments staziunars nua pussibel ed uschia distgargiar las clinicas dals Servetschs psichiatrics dal Grischun.
