Otg differents lieus aifer nov dis, quai è la turnea che Men Juon dal bain da chavals San Jon a Scuol fa actualmain. Sin quella turnea promova el ils pomchips ch'el ha pudì far cun la racolta dals tartuffels da l'onn passà. Ma cumenzain da l'entschatta:
L'idea da plantar tartuffels deriva il 2021 dal serrer Simon Grämiger che lavura adina puspè per Men Juon. L'idea ha plaschì ed uschia èn era vegnids plantads l'onn 2022 tartuffels sin in funs da 20 aras. La racolta è vegnida fatga cun agid da blers voluntaris, cun chavals ed era cun maschinas agriculas vedras sco dal tschientaner passà. Ina gronda fascinaziun, betg mo per ils voluntaris mabain era per Men Joun:
Jau pens che sch'ins lavura cun chavals e betg cun il computer, sche lura èn ins forsa plitost fan da rauba veglia empè da nova moderna. E quests utensils vegls èn schon anc interessants.
Suenter la racolta èn las bun trais tonnas tartuffels vegnidas partidas: 1,2 tonnas èn restadas a San Jon per il restorant ed il rest, las 1,8 tonnas, èn idas a Spreitenbach en la fabrica da Zweifel Pomy-Chips SA per ch'i po vegnir fatg pomchips londerora. Avair ina tala collavuraziun na sa chapescha betg da sez, ma ils frars Zweifel èn adina puspè vegnids a sella a San Jon e tras quai è lura sa dà l'amicizia tranter els e Men Juon. La fin finala ha quella purtà Men Juon uschè lunsch, ch'el ha perfin pudì chavaltgar cun ils frars al Sächseläuten duas giadas.
In mez onn pli tard èsi lura stà uschè lunsch e Men Juon ha pudì retschaiver l'ediziun speziala dals 3'000 pacs da pomchips a Spreitenbach. E gia hai gì num d'els preschentar sin la turnea cun in emprim termin il suentermezdi a Höngg. In di pli tard a Forch, il glindesdi al lai da Lützelsee ZH, il mardi a Cuira e Küblis, il venderdi ad Ardez e Scuol e la dumengia lura a l'EBexpo a Scuol.
In quint che na sa paja betg
L'entir transport n'è betg be cun chavals, be tscherts tschancuns. Uschia vegnan las charrotschas ed ils chavals adina puspè chargiads en ils chars annex per charrar al proxim lieu, nua ch'igl è da guardar ed organisar lieus pussaivels per star sur notg, cun avair pavel e stallas ma era hotels per la famiglia ed il persunal d'agid. E silsuenter èsi era anc dad organisar in lieu cun ustaria, per ch'ils magiels da l'apero pon vegnids schubergiads.
I era segir in sforz, ma in sforz legraivel che tuts involvads han fatg cun gronda voluntad e plaschair e lura n'èsi era betg pli in stuair.
Almain tuttina bler temp hajan els impudì en l'entira organisaziun da la tura sco dad esser a l'apero sez, di Men Juon. E sch'ins fa il quint, lura vegn svelt cler, che quai na po betg render. In pac pomchips custa 5 francs, da quel van 1 franc a l'instituziun «Stiftung Chance» per uffants fermamain malsauns. Era quai è ina colliaziun ch'è sa dada tras l'ir a sella a San Jon.
Tuttina, per l'onn che vegn è gia planisà da puspè plantar tartuffels – la glisch verda cun Zweifel Pomy-Chips SA hajan els gia ussa.
