En il Grischun datti 39 circuls electorals. Il pli grond è Cuira cun 21 sez e che represchenta passa 30'000 persunas cun dretg da vuschar. Ed il pli pitschen è Avras cun in sez che represchenta stgars 160 persunas. Da quests mini-circuls datti plirs – e quests sajan tenor Anita Mazzetta da la Verda il problem perquai ch'els pon falsifitgar la veglia da la populaziun.
Tras il sistem datti persunas cun buns resultats che n'èn betg vegnidas elegidas. Persuenter pon persunas cun paucas vuschs prender plaz en il Cussegl grond.
Las differenzas da grondezza dals circuls èn grondas. Il circul Avras vala tar las elecziuns sco singul – en auters temas sco dretgiras tutga quest tar la regiun Viamala. Da parter si ils circuls tenor regiuns fiss tenor Fabian Collenberg dal Center ina pussaivladad. Ins duess dentant era represchentar las pitschnas regiuns en il chantun.
Mario Cortesi, il deputà da la Partida populara svizra, è cuntent cun il proporz dubel. Era sch'i dat cun ils circuls cun in sez per intgins in dischavantatg, na vesa el betg il basegn da midar ils circuls.
