38 dunnas e 82 umens represchentan ils circuls electorals a partir da proxim avust en il Cussegl grond. Cun in clic sin il circul electoral datti la survista da las persunas elegidas.
Il dumber da las dunnas è bain sa sminuì levet da 42 sin 38 dunnas. Sco tar la legislatura actuala munta quai anc adina radund in terz. Qua n'hai pia betg dà ina midada gronda. Tge che dat er en egl: La cumpart da las dunnas variescha ferm tenor partida. Fertant che la PS ha dapli dunnas che umens, èn tar la PPS 31 da 35 persunas umens.
Burgais pli dretgs – sanesters pli differenziads
La statistica da panaschar da la chanzlia chantunala mussa il suandant: La PPS ha surtut pudì «engular» vuschs da la PLD e dal Center. Tar las partidas sanestras han surtut ils Verds pudì ir per vuschs da la PS – 5 pli pauc per la PS, 5 dapli per ils Verds. La PS e la Verda han enfin uss furmà ensemen ina fracziun. Las vuschs èn pia restads en il medem champ.
Cun las midadas en las fermezzas da partida datti er intginas novas persunas: Concret èn 44 persunas novas en il parlament chantunal. La gronda part èn natiralmain persunas da la PPS cun quai ch'els van per 10 sezs dapli.
Da las 44 persunas che bandunan il parlament actual, van 25 voluntariamain, 18 n'èn betg vegnidas reelegidas e Valérie Favre Accola dat giu ses sez en il Cussegl grond perquai ch'ella è vegnida elegida en la regenza.
Cun in tschegn d'egl: Las 25 persunas che bandunan voluntariamain il parlament suenter questa legislatura èn stadas ensemen 309 onns en il Cussegl grond. Vul dir: In pluna experientscha pli pauc en il nov parlament. Da quellas 25 persunas è Beatrice Baselgia da la PS stada il pli ditg en funcziun sco deputada – numnadamain 29 onns.
Da 27 fin 75 onns
En media èn las deputadas e deputads 50 onns vegl. Las dunnas èn cun 47 onns schizunt in pau pli giuvnas. La pli giuvna persuna en il nov parlament è Sarina Caduff da la al Lumnezia (Center) cun annada 1999. La pli veglia persuna è Renatus Casutt da Glion (PPS) cun annada 1951. Tranter las persunas las pli giuvnas sa chattan plitost persunas da las partidas sanestras dal center.
Intgina fatscha enconuschenta che resta u parta
Tgi che persequitescha qua u là las debattas dal parlament vegn a partir da proxim avust a vesair ch'ina u l'autra vusch dominanta manca. Betg pli candidà ha per exempel Reto Crameri da Surava. El tutgava tar las figuras prominentas dal Center ed era enconuschent per sa participar fermamain a las debattas.
A Breil perda il Center ses sez sin donn e cust da Heini Hunger ch'ha rimnà dapli vuschs ch'il president communal da Breil Roman Flepp. A Glion hai tutgà Martina Beeli (Center) e Hanspeter Bundi (PLD) ch'han da surdar a Caroline Huber (Verda) e Gian Marco Bianchi (PLD). Ed a Cuira sto la PLD laschar plimas, Oliver Hohl ed Andrea Thür-Suter n'èn betg vegnids reelegids. Uschia han ils liberaldemocrats da Cuira be pli dus enstagl da quatter mandats.
Pers in sez ha era la Partida verdliberala en il circul da Maiavilla, là n'hai betg tanschì per la reelecziun da Gaudenz Bavier, l'anteriur president da la partida. Ses mandat surpiglia Rico Rieder da la Partida populara.
Ina u l'autra persuna enconuschenta fa da nov part dal parlament, per exempel Daniel Albertin, il president communal partent da la vischnanca Albula/Alvra. Ed er las deputadas e deputads ch'han candidà per la regenza: numnadamain Aita Zanetti, Nora Saratz Cazin e Maurizio Michael. Els trais èn tuts vegnis reelegids en il parlament – e vegnan pia er vinavant ad avair in pled en chaussa quai che pertutga la politica chantunala.
Quatter nums da famiglia dubels
Il Grischun è in chantun grond – dentant tuttina sa chattan en il parlament chantunal intginas persunas cun il medem num. Uschia datti duas Zanettis, dus Krättlis, dus Hungers e dus Crameris. Sche quellas persunas èn parentas na pudain nus betg dir. I dat dal rest er otg Martins, uschia ch'il Cussegl grond consista per var 7% ord Martins.
