Valérie Favre Accola surpiglia il sez da Jon Domenic Parolini ch'ha cuntanschì la limita da temp en uffizi. Cunquai returna la Partida populara svizra suenter 18 onns puspè en la regenza grischuna. Valérie Favre Accola ha fatg passa 32'000 vuschs, e cunquai radund 7'000 vuschs dapli che la verdliberala Nora Saratz Cazin ch'è vegnida sisavla.
Uschia èsi reussì a Valérie Favre Accola quai che n'è betg reussì a ses collegas da partida Roman Hug (2022), Walter Schlegel (2018) e Heinz Brand (2014). Favre Accola sa legra da ses bun resultat e di che quai saja stada lavur communabla e che ses antecessurs hajan fullà via a quest success per la PPS.
18 onns avain nus duvrà ed uss èsi reussì. La basa solida da la partida è stada il fundament per il success dal di dad oz.
Per il president da la PPS dal Grischun èsi in fitg bel resultat. 18 onns saja stà in lung temp senza influenza en la regenza. Quai sa midia uss dentant. Ins haja blers buns concepts ed ideas per il Grischun ed era la populaziun veglia che quels concepts vegnian purtads en la regenza.
La partida ha stuì cuntanscher la maiorennitad, hai jau adina ditg. Igl è stà in lung temp senza influenza en la regenza.
Sco ultima represchentanta da la PPS è Barbara Janom Steiner vegnida elegida il 2008 en la regenza. Curt suenter hai dà la separaziun da la Partida populara, Janom Steiner ha lura cuntinuà en la Partida burgaisdemocratica.
Martin Bühler fa il meglier resultat
Cun 42'299 vuschs fa Martin Bühler da la Partida liberaldemocratica las pli bleras vuschs – radund 2'000 vuschs dapli che Marcus Caduff dal Center (40'153 vuschs).
Per Martin Bühler è il top resultat era ina incumbensa da la populaziun. I saja in tschert squitsch da cuntinuar cun buna lavur. Il resultat saja era in mussament che l'entira regenza haja fatg buna lavur ils davos quatter onns.
Medemamain cuntent è er Marcus Caduff cun l'agen resultat, pli pauc plaschair fai ch'il Center ha pers in sez en la regenza. Ins n'haja betg quintà che la PPS vegnia cun tala forza ed i saja per els era stà grev da chattar candidats e candidatas. Fatg memia pauc n'haja la partida però betg en il cumbat electoral.
Silsuenter datti in sigl da bunamain 6'000 vuschs tar Carmelia Maissen (34'519 vuschs), Peter Peyer (32'856 vuschs) e Valérie Favre Accola (32'141 vuschs) suondan curt suenter.
La populaziun ha vis e renconuschì la lavur dals davos quatter onns da tut las persunas en uffizi, di Carmelia Maissen. Ella sezza è cuntenta cun l'agen resultat ed è era leda ch'il temp dal cumbat electoral è passà per puspè pudair sa concentrar sin la lavur dal mintgadi. Quai malgrà ch'il temp avant las elecziun saja era in bel temp cun bler e stretg contact cun la populaziun.
Ed era Peter Peyer è cuntent cun il solid resultat da sia elecziun. El haja cleramain surpassà il pli absolut e cunquai la conferma da la populaziun da cuntinuar cun la lavur d'enfin uss.
Zanetti e Saratz Cazin fan quasi medem bleras vuschs
Las duas candidatas da l'Engiadina manchentan il pli absolut per bunamain 1'000 vuschs. Nora Saratz Cazin fa 24'908 vuschs ed Aita Zanetti 24'742 vuschs. Suenter il cumbat electoral intensiv è Saratz Cazin emoziunala ed er dischillusa ch'i n'haja betg bastà per ella.
Ella avess fitg gugent surpiglià in mandat en la regenza, ma uss vesia ella il positiv. Uschia per exempel ch'ella restia en Engiadina ed uschia pli datiers da ses uffants. La raschun daco che la dunna da Puntraschigna n'ha betg fatg la cursa, saja grev analisar il di d'elecziun.
Tge ch'è stà il motiv per la sconfitta èsi d'analisar: forsa las quatter candidaturas dal Grischun dal Sid ubain la partida gronda cunter la partida pitschna.
Sche Nora Saratz Cazin vul en quatter onns anc ina giada empruvar da recaltgar in sez en la regenza grischuna per la Partida verdliberala na possia ella oz anc betg dir. Quai decidia ella lura en dus enfin trais onns.
Ad Aita Zanetti n'èsi betg reussì da defender il terz sez da dal Center grischun. Malgrà la sconfitta è ella persvadida che la partida haja fatg in bun cumbat electoral e che las ambiziuns na sajan betg stadas memia grondas da vulair defender trais sezs. Ella haja fatg ina massa novas experientschas en il cumbat electoral e sa legra da puspè pudair trair in zic pli profund flad.
Nagina schanza per Michael e Bott
In toc pli paucas vuschs han fatg Maurizio Michael (13'827 vuschs) da la Partida liberaldemocratica ed il candidat senza partida, Reto Bott (10'593).
La candidatura da Maurizio Michael saja stada il mussament che la PLD possia candidar cun duas persunas, senza donnegiar la candidatura principala, declera il president dals liberaldemocrats grischuns. Donn saja che l'argument da represchentar l'italianitad na saja betg vegnì chapì sco argument da cuntegn, mabain sco argument da quota. Cunquai ch'el saja vegnì reelegì en il Cussegl grond sa legria el da cuntinuar cun la lavur politica.
Il resultat da passa 10'000 vuschs motivescha Reto Bott da cuntinuar cun la via politica. El haja emprendì bler en il temp dal cumbat electoral. El haja per part fatg sbagls e saja stà memia direct – haja dentant era constatà che s'occupar da problems concrets da persunas portia success.
La participaziun a l'elecziun è stada tar 49,59%, il pli absolut è tar 25'604 vuschs.
Differenzas regiunalas
La candidata da la PPS ch'è oriunda da Tavau ha gì grond sustegn da la patria. Radund 64% dals electurs e da las electuras han elegì ella. En l'ulteriur Grischun è ella stada sin il cedel da votar d'almain 40% da quels e quellas ch'han elegì.
Era tar ils ulteriurs candidats e candidatas vesan ins differenzas regiunalas. Carmelia Maissen e Marcus Caduff han fatg il meglier resultat en la Surselva e Maurizio Michael ha survegnì sustegn oravant tut da las valladas talianas.
Selecziunar il candidat u la candidata per vesair las vuschs per questa persuna tenor regiun: