Co è quest resultat da valitar?
En sasez èsi stà ina dumonda dal temp. Cura gartegia quai a la Partida populara svizra dal Grischun da recaltgar quest sez en la regenza – 18 onns ha la PPS stuì spetga ed uss en la tschintgavla emprova èsi gartegià. La PPS ha mess questa giada sin la dretga persuna ed uschia recaltgà quai sez desiderà.
Resumà pudess'ins era dir: il suveran grischun ha fatg ina correctura oz ed elegì la ferma partida era en l’executiva ed il Grischun è era restà in chantun burgais.
Pertge èsi lura gartegià questa giada a la PPS da recaltgar quest sez?
Valérie Favre Accola è stada la candidata ideala per la PPS ed igl è gartegià ad ella dad ir per vuschs er ordaifer ils circuls da l'atgna partida. Favre Accola è stada omnipreschenta las ultimas emnas. Ils placats èn stads focussads fitg sin ella, strusch sin la partida. Sia fotografia cun las colurs mellen e blau davostiers – las colurs da Tavau e betg cun la colur verda ch’ins associescha immediatamain cun la PPS. Roman Hug avant quatter onns u Walter Schlegel avant otg onns èn sa preschentads bler pli fitg sco candidats da la PPS.
Valérie Favre Accola è presidenta dal Cussegl grond, sco pli auta grischuna, è ella dapi l'avust passà, bler da viadi tras il Grischun, ha gì numerus inscunters cun la populaziun e tenor mai è quai segir stà in avantatg per ella – er sch’ella sezza valitescha quai plitost sco dischavantatg cunquai ch’ella na dastga betg s’exponer politicamain.
Las duas candidatas Nora Saratz ed Aita Zanetti èn sin posiziun sis e set. Omaduas han quasi tuttina bleras vuschs, suandadas da Maurizio Michael e Reto Bott. Co è quai d'interpretar?
La teoria, che las candidatas ed ils candidats dal Grischun dal sid han concurrenzà in l’auter ed han engulà vuschs ina da l’auter, quella ha tenor mai, schon in zic vardad. Lain prender il cas d'ina votanta u d'in votant dal Grischun dal Sid che ha vulì confermar ils quatter cussegliers e cussegliera en uffizi e vulì dar la tschintgavla vusch ad ina u in da l'atgna regiun. Quel ha gì la schelta ed ha pudì eleger tranter quatter persunas e quellas quatter persunas han repartì las vuschs e profità da quai ha la finala Valérie Favre Accola.
Sche nus guardain sin ils resultats dad oz: Tge dat en egl u tge far surstar?
Il resultat correspunda a quai che la prognosa ha preannunzià – almain la successiun, la glista da rangaziun. Mai persunalmain fa il resultat dal candidat giuven Reto Bott surstar in zic – passa 10'000 vuschs. Quai è tuttina in resultat remartgabel e be 3'000 vuschs pli pauc che Maurizio Michael, il segund candidat dals liberaldemocrats ch’è commember dal Cussegl grond e president da la PLD grischuna.
Sut il stritg san ins dir: il suveran grischun na fa betg gronds gieus u experiments politics. El conferma ils quatter cussegliers en uffizi ed il tschintgavel sez va cleramain a la candidata da la pli ferma partida grischuna.
Valentin Schmed
Manader actualitad RTR
