La Partida Populara ha gudagnà questas elecziuns. En futur è ella represchentada cun 35 persunas en il Cussegl grond. Il Center perda – sper in sez en la regenza – sis sezs en il parlament n'è betg pli la fracziun la pli ferma. Terz-gronda fracziun è la PLD.
Il cunfin da 3% per vegnir en il parlament adempleschan tut las partidas. Tut las partidas han almain 5 sezs ed han cun quai fermezza da fracziun. La participaziun a l'urna ha muntà a 47,9% – cun in spectrum da var 40 fin 67%.
Burgais pli dretgs – sanesters pli differenziads
La statistica da panaschar da la chanzlia chantunala mussa il suandant: La PPS ha surtut pudì «engular» vuschs da la PLD e dal Center. Tar las partidas sanestras han surtut ils Verds pudì ir per vuschs da la PS – 5 pli pauc per la PS, 5 dapli per ils Verds. La PS e la Verda han enfin uss furmà ensemen ina fracziun. Las vuschs èn pia restads en il medem chomp.
Questas persunas èn elegidas
38 dunnas e 82 umens represchentan ils circuls electorals a partir da proxim avust en il Cussegl grond. Cun in clic sin il circul electoral datti la survista da las persunas elegidas.
Ils resultats da tut las persunas ch'han candidà chattais Vus qua. Igl è er pussibel da sortir tenor partida, circul e vuschs.
Trumpada tar il Center
Per il president dal Center Grischun, Kevin Brunold, n'èra oz betg in bun di: Perder sis sezs en il parlament e betg pli esser la fracziun la pli ferma fetschia mal. Surtut trists saja el per las persunas ch'èn betg vegnidas reelegidas. In motiv per il resultat nausch saja tenor el l'iniziativa da 10 milliuns – quella haja tratga bleras persunas dretgas a l'urna. Il proxim temp stoppia il Center dentant pigliar sut la marella ils resultats.
Grond plaschair tar PPS e Verda
Pli grond è il plaschair tar la Verda: Ins haja cuntanschì la finamira dad avair fermezza da fracziun – in grondius sentiment, uschia la presidenta Anita Mazzetta. Lur campagna saja stada «freha e frestga», quai ch'haja plaschì la glieud.
Ed il pli grond è il plaschair tar la PPS. Sco ch'il president, Roman Hug, ha ditg, hajan ins tschernì ils dretgs temas – per exempel segirezza.
Nus avain sentì in via che la glieud vul realisar noss temas.
El haja il sentiment che la glieud sa fida er da la PPS e ch'ella po realisar quests temas. Il nov parlament vegn saramentà durant la sessiun d'avust. La nova regenza va en uffizi a partir da l'onn proxim.
