Set sezs dapli ha la Partida populara svizra da nov en il parlament a Berna. Suenter quest resultat possian ins en mintga cas discurrer d'in «ferm spustament a dretga», analisescha la politologa da l'institut gfs.berna Corina Schena. Betg be en il chantun da Berna mabain er en ils chantuns Sutsilvania e Sursilvania hai dà las ultimas emnas elecziuns chantunalas cun in augment per la PPS.
Questa tendenza pudess era sa mussar en las elecziuns naziunalas ch'èn l'atun 2027. Malgrà ch'i na dat anc betg prognosas pli exactas quinta la politologa che la PPS pudess schizunt cuntanscher ina quota d'electuras da 30% e dapli.
Il zercladur 2026 èn las elecziuns da regenza e dal parlament en il chantun Grischun. Er en il Cussegl grond quinta gfs.berna che la PPS pudess vegnir pli pussanta. Gist la part rurala dal Grischun saja cumparegliabla cun la champagna en il chantun da Berna e là èsi d'observar in augment per il spectrum dretg, la PPS e l'Uniun democratica federala.
Dapli fadia ha la partida mintgamai da recaltgar in sez en la regenza grischuna. Pudess ella profitar dal schlantsch actual e suenter onns d'emprova reussir? Corina Schena di che las schanzas sajan pli bunas ch'era gia. Cun Valérie Favre Accola haja la PPS en mintga cas ina candidata che pudess era recaltgar vuschs d'auters camps politics, era perquai ch'ella è ina dunna. Er en auters lieus saja stà d'observar ch'ina dunna recaltgia mintgamai vuschs da dretg enfin sanester.
Dumondas da segirezza globala en il center
Entras las differentas guerras sin il mund èn dumondas da segirezza actualmain d'impurtanza per la populaziun. Segirezza è in tema che cunzunt la Partida populara svizra scriva grond sin sia bandiera. Cun quest tema vegnia la partida da persvader electuras ed electurs, era persunas ch'elegevan avant anc autras partidas. I saja in zic la dumonda tge partida che vegnia anc da sa servir dal tema segirezza globala.
Sper la PPS ha er la PS gudagnà quatters sezs en il parlament da Berna. Partidas da pol hajan en temps malsegirs pli simpel da mobilisar e sajan tendenzialmain en avantatg, di Corina Schena. Dentant enfin ch'i vegn elegì po anc capitar bler.