Sin las pistas dad Arosa/Lai han ils otg candidats e candidatas prendì schlantsch per la fasa decisiva dal cumbat electoral – quai sin invit da l’Allianza da turissem, pia las pendicularas, la gastronomia e la hotellaria. Per quatter dals candidats è quai ina situaziun tut nova da candidar per la regenza. Tar ils candidats che sesan gia en la regenza è la gnervusitad fertant pli pitschna.
Trais dals candidats e las candidatas novas èn effectiv sa preparads per quest di da skis. La candidata da la Partida verd-liberala (PVL), Nora Saratz Cazin, vuleva per exempel manar ses skis vegls en il service. Là hajan ins dentant manegià, che quai na fetschia nagin senn e ch’ella dovria novs skis. Uss saja ella pia svelta e pronta – era per il cumbat electoral. Valérie Favre Accola, da la Partida populara svizra (PPS), haja fertant profità da l’expertisa da ses um, in skiunz.
Quai hai jau delegà a Pauli, el ha drizzà mes skis. Dat tschaira e vegnì glimà na sajan ils skis dentant betg – quai faschain l’entschatta e la fin da la stagiun.
Maurizio Michael, Partida liberaldemocratica svizra (PLD), haja prendì ses skis a fit perquai ch’el ha nagins agens. Quest di saja stà ina bun'occasiun da puspè ina giada ir sin pista. La quarta en la runda dals candidats e candidatas novas è Aita Zanetti. La candidata dal Center n'ha betg pudì prender part a las discussiuns da tschaira e skis. Ella è numnadamain en gir cun crutschas pervia d’in pe rut.
Per las quatter persunas che candideschan per l’emprima giada è quai ina nov'experientscha. Aita Zanetti di, ch’ella survegnia adina puspè critica ed avis da ses conturn e famiglia – quai gida ella en il cumbat electoral. Per ella restia sia lavur sco presidenta communala dentant era durant quest temp la prioritad. Era Nora Saratz Cazin saja occupada cun sia lavur sco presidenta communala da Puntraschigna ed era cun sia famiglia. Per survegnir tips saja ella ida per agid professiunal per il cumbat. Il cussegl il pli impurtant saja stà, da far quai ch'ella fetschia gia dapi sis onns sco presidenta communala: politica per la chaussa.
Era Maurizio Michael na possia durant quest temp intensiv betg simplamain laschar da la vart sia lavur sco coordinatur da projects. E dasper na dastgia era la famiglia betg vegnir a la curta.
Igl è grev, ins sto pudair improvisar e programmar ses temp – alura funcziuni.
D’avair ina gronda chargia da lavur, da quai saja Valérie Favre Accola disada pervia da l’onn passà cura ch’ella ha surprendì dus departaments en la vischnanca da Tavau. Sper il cumbat electoral vegnian vitiers anc la famiglia e la lavur. Sia agenda saja pia plaina ed actualmain na dettia naginas fin d’emnas libras u vacanzas.
Main agitaziun tar la regenza actuala
Marcus Caduff e Peter Peyer èn ils dus cun la pli gronda experientscha en la regenza – dapli il 2019 fan els part da questa. Uschia che la gnervusitad e la tensiun è betg pli uschia gronda tar il terz cumbat electoral ch’els fan. Peter Peyer da la Partida socialdemocratica sa regorda ch’il emprim cumbat era pli strentg, dentant ins possa quai uss betg prender memia luc. El di chi saja ina tensiun mesauna. E Marcus Caduff dal Center di ch’el saja alura vers la fin segir gnervus e simplamain mirveglius. Era el sa regorda ch’il emprim cumbat era tut auter.
Per Martin Bühler e Carmelia Maissen è quai il segund cumbat electoral ch’els fan. Martin Bühler da la Partida libereldemocratica na prenda il cumbat betg pli luc, dentant bada el ch’el ha dapli experientscha e sa per exempel tge ch’in moderatur d’ina discussiun da podium manegia u vul savair tar ina dumonda. En l’emprim cumbat electoral dal 2022 haja el gì bleras novas ideas. Uss sappia el meglier nua ch’el po dar gas e nua che las schanzas èn realas.
Jau hai observà ils novs e sco chi para a mai hai quests dapli rutina sco jau avant quatter onns.
Era Carmelia Maissen dal Center sa po fidar da sia experientscha. Ella sa regorda che avant quatter onns era anc il temp da corona e pervia da quai sajan ils prims eveniments dal cumbat electoral stats dubel spezial. Per el saja tut stat nov e sa veva da disar – uss saja ella en ina tut autra situaziun.
Nagina garanzia per reelecziun
En Grischun hai anc mai dat la situaziun, ch’in cusseglier u ina cussegliera guvernativa na è betg vegnida reelegida. Ed era quest onn na dettia nagina garanzia, la concurrenza saja gronda – quai è a tuts conscient. Actualmain candideschan otg persunas per tschintg sez en la regenza.
In Grischun è anc mai intgin betg pli vegnì reelegì – dentant ins vul era betg esser il prim che rumpa questa regla. Pervia da quai dovri grond engaschi.
Martin Bühler manegia che i saja il pli tup ch’ins savess far, da pensar che questa cursa saja schon fatga. E Marcus Caduff sa che en in cumbat resta la pussaivladad da betg vegnir reelegì. El fiss fitg trumpà ma el di ch’ins stoppia quintar cun quai e savair ir enturn cun quai. E la Carmelia Maissen manegia, ch’il quint vain alura fatg ils 14 da zercladur. A quest di vain elegida la regenza Grischuna ed era il parlament.