Il preventiv il pli modest per il cumbat electoral per parlament e regenza paran d'avair ils verd-liberals. Els impundan en tut var 155'000 francs che vegnan da differentas funtaunas. «Ils daners vegnan da contribuziuns da las commembras e dals commembers da la partida, da taxas da mandat dals titulars e las titularas d'in uffizi sco era da donaziuns», di la presidenta Géraldine Danuser. Quai tanschess segir per in fitg bun Mercedes.
Per las elecziuns dal Cussegl grond avain nus quasi dublegià la summa.
La raschun saja che la partida haja cuntanschì l'ultima giada fermezza da fracziun. Entras quai haja la partida dapli taxas da mandat e pudì incassar dapli.
In zic dapli daners impunda Il Center. Là sajan quai var 180'000 francs. Quai che tanschess probablamain gia per in Porsche Carrera. Ma il preventiv saja pli bass che tar las ultimas elecziuns avant quatter onns, di il schef da campagna, Fabian Collenberg: «Avant quatter onns è il preventiv segir stà pli aut, cunquai che nus avain lura fatg la fusiun da las anteriuras duas partidas e tras quai anc fatg intginas mesiras dapli en il cumbat electoral, oravant tut per era pudair preschentar nossa partida a las electuras ed als electurs». Vinavant di el:
Vi dals custs da quels 180'000 francs che nus avain, impundan mintga candidata e mintga candidat circa 20'000 francs.
En ina sumeglianta classa da pretsch fiss er il bolid dals socialdemocrats. Cun stgars 200'000 francs tanschess quai là per in Aston Martin Vantage. L'import saja sumegliant sco avant quatter onns, di il schef da campagna, Joshua Wada.
Nus dain ora in zic dapli tar las elecziuns da la regenza – nus discurrin qua però da 10'000 francs dapli.
Nua ch'i dettia tuttina anc ina vaira differenza saja tar las elecziuns dal parlament e tar las elecziuns dal Cussegl grond. Là dettian els ora bunamain 30'000 francs pli pauc. Quai perquai ch'els fetschian dapli intern, surtut l'entir layout.
Ils pli blers daners ha la PLD
In cresus, en cumparegliaziun cun las autras partidas, para d'esser la Partida liberaldemocrata. Lezza pudess probablamain cumprar senza problems in Ferrari Roma cun ses preventiv per las elecziuns: circa 240'000 francs sajan quai questa giada, di Christof Kuoni che maina la campagna dals liberals. Era tar la PLD vegnan ils daners da differentas funtaunas: d'ina vart sajan quai daners or da la cassa da la partida, en la quala ch'ins fetscha mintg'onn reservas ils onns senza elecziun. Da l'autra vart dettia anc daners che vegnan generads or dal club da supporters sco era da donaziuns. La PLD è enconuschenta sco partida d'economia, ma quella na saja gnanc uschè ferm participada vi dals custs dal cumbat electoral.
Igl èn donaziuns da 20'000 francs, surtut da persunas privatas. Da l'economia vegn be ina pitschna part dals daners.
La Partida populara svizra perencunter na tradescha betg, quants daners ch'ella prenda enta maun per il cumbat electoral. Roman Hug, il president da la PPS di ch'ins na veglia betg communitgar las cifras.
Nus sco partida na communitgain naginas cifras concretas.
La PPS profiteschia cunzunt da lavur voluntara dals 120 candidats e da la candidata per il Cussegl guvernativ, di Hug. Or da quest motiv na possian els betg prestar campagnas charas, mabain sajan cumplainamain dependents da l'engaschi da mintgin. Ma era tar la PPS tanschess quai segir era per in vehichel da quatter rodas. Probablamain per in sumegliant bun, sco tar las autras partidas.
Tuttina sco che las elecziuns dals 14 da zercladur vegnan ora: In u l'auter che perda, pensa forsa gia suenter las elecziuns ch'el avess meglier cumprà in auto da sport per tut quels raps.