Nagin Blind date tranter la PPS e la PVL
En la terza ed ultima runda èn vegnids a pled:
- Reto Rauch: Partida populara svizra, inschigner agronom e gastronom, vul vegnir reelegì per il circul Suot Tasna.
- Simon Rageth: Partida verd-liberala, spezialist da communicaziun, vul vegnir reelegì per il circul dals Tschintg Vitgs.
Perquai che Simon Rageth na discurra betg rumantsch ha mintga candidat survegnì ina mes'ura temp cun la moderatura.
Reto Rauch è vice-president da la cumissiun da sanadad dal Cussegl grond. Per el sa mussi adina puspè che la populaziun vul il provediment da sanadad sco che quel è uss. Il medem mument stoppia la populaziun dentant era esser pertscherta che quest provediment custa.
Plinavant è el da l'avis ch'i dat memia blers lufs en il Grischun. Ins pudessi dar liber pli blers per la regulaziun, reagir pli spert sche trieps fan problems ed includer chatschadurs e chatschaduras.
Per Simon Rageth è la midada da las energias impurtanta. El vesa ch'igl è difficil cun parcs solars gronds – e dentant persvadì ch'i dovra simplamain temp e ch'igl è impurtant da persvader la populaziun.
Il chantun sto era vinavant lavurar vi da mesiras per reglar il traffic, las emprimas mesiras funcziunan gia. Plinavant è era il traffic public impurtant per el. In bun tact e colliaziuns era la bun'ura baud u la saira tard tutgan al service public. Quel saja impurtant, custia dentant era, di Rageth.
Elecziuns GR 26
In «Blind Date» tranter la Verda ed il Center
En la segunda runda èn s'inscuntrads:
- Anita Mazzetta: Verda, experta d'ambient, vul vegnir reelegida per il circul da Cuira.
- Fabian Collenberg: Center, cussegliader da vischnancas, vul vegnir reelegì per il circul Cadi.
Omadus renconuschan la polarisaziun pli ferma, accentueschan dentant ina cultura da debatta vinavant objectiva. Differenzas sa mussan per exempel tar la valitaziun dal sistem da proporz e tar dumondas da l'ambient sco il tractament dal luf.
Plinavant en il focus èn la politica da clima ed energia sco er la mancanza d'abitaziuns:
Anita Mazzetta s'engascha per in schlargiament consequent d'energias regenerablas cun resguardar la biodiversitad e pledescha per dapli intervenziuns statalas a favur da spazi d'abitar pajabel e d'emprimas abitaziuns.
Fabian Collenberg accentuescha la rolla da las vischnancas, s'exprima cunter la surregulaziun e vesa schliaziuns plitost en soluziuns localas, per exempel cun cooperativas.
In «Blind Date» tranter la PLD e la PS
L'entschatta han fatg Fabio Luzio e Silvio Dietrich:
- Fabio Luzio: PLD, electroinstallatur/inschigner da Cunter vul vegnir reelegì en il Cussegl grond per il circul Surses.
- Silvio Dietrich: PS, manager per furmaziun da la regiun da Glion, vul restar en il parlament per il circul Glion.
Fabio Luzio accentuescha ses engaschi per l'energia e la regiun Surses, Silvio Dietrich metta ses accents en la furmaziun, famiglia e plurilinguitad.
Tuts dus vesan tar la digitalisaziun e tar smartphones ristgs per uffants, refusan dentant plitost scumonds generals e pledeschan persuenter per accumpagnament, responsabladad e soluziuns individualas en scola e famiglia.
Tar l'energia accentueschan omadus l'impurtanza da funtaunas regenerablas, vesan dentant grondas sfidas tar la realisaziun, custs e conflicts da finamiras tranter la protecziun dal clima e da la natira; soluziuns pragmaticas pass per pass vegnan favurisadas.
Omadus mettan sin la mobilisaziun da lur electurs, èn sut squitsch da concurrenza en lur regiuns e speran sin ina gronda participaziun a las elecziuns.