Retschertga regenza - Tschintgavel sez: cursa piz a cup cun avantatgs per Favre Accola

Ils 14 da zercladur elegia il Grischun ina nova regenza ed in nov parlament chantunal. Per la regenza da tschintg sezs stattan a disposiziun nov candidatas e candidats, quatter dad els èn gia en uffizi e lur reelecziun para d'esser segira, quai mussa la retschertga da Sotomo fatga stgars dus mais avant l'elecziun. Per il tschintgavel sez datti ina cursa stretga tranter trais candidatas novas.

Tschintgavel sez: butin per la partida populara u verdliberala

Il tschintgavel sez è in che mida tradiziunalmain adina puspè colur en il Grischun. La retschertga mussa ch'el pudess er questa giada puspè ir ad in'autra partida, questa giada en la tschintgavla emprova forsa a la Partida populara. Cun Valérie Favre Accola è la PPS numnadamain a la testa da la cursa cun 39%. Ella saja «la candidata optimala» da la partida ed elegibla er sur ils cunfins burgais, di Michael Hermann, politolog da l'institut Sotomo. Favre Accola ha tenor la retschertga grond sustegn da l'atgna basa (95%) e persvadia cun sia preschientscha ed haja meglras schanzas che candidats dals ultims onns.

La cursa è dentant stretga, sin ils chaltgogns da Favre Accola è Nora Saratz Cazin da la Partida verdliberala cun in sustegn da 36%. Sper grond sustegn en l'atgna partida (90%) rimna ella er vuschs da la vart sanestra, cunquai ch'i dat da lezza vart cun Peter Peyer mo in candidat. Sche Saratz Cazin recaltgass il sez en la regenza, fiss quai ina sensaziun. Ils Verdliberals han be dus mandats en regenzas chantunalas, quai a Basilea-Citad e Sutsilvania.

Cun in zic dapli retard, ma anc adina en la cursa è Aita Zanetti dal Center. En egl dat cuzunt ch'ella n'ha betg tant sustegn (57%) da l'atgna basa, persuenter paran er electuras ed electurs da las partidas sanestras a simpatisar cun ella. Per mantegnair la maioritad dal Center en la regenza duvrassi tenor Hermann ina candidata cun in ferm profil ch'il suveran vul per tut pretsch en la regenza.

Actualmain vesi or uschia sco sche la regenza grischuna daventass uschè feminina sco anc mai. Sch'ina da las trais candidatas novas fa il pass en la regenza fissan per l'emprima giada insumma duas dunnas en la regenza. Enfin uss han sper Carmelia Maissen ch'è actualmain en la regenza anc Eveline Widmer-Schlumpf (1999-2007) e Barbara Janom Steiner (2008-2018) politisà en l'executiva grischuna.

Pli pauc sustegn han ils dus candidats novs. Maurizio Michael, il candidat da la PLD, elegessan 22% da las persunas dumandadas. In resultat mediocher per in candidat d'ina partida etablida en la regenza, analisescha Hermann. El na quinta betg che Maurizio Michael vegnia anc da surpassar las trais dunnas. Ad el manca cunzunt er sustegn da l'atgna basa. A la cua da la rangaziun è Reto Bott, il candidat senza partida ch'è vegnì enconuschent pir avant paucas emnas cuntanscha 10%.

Ils quatter en uffizi sesan ferm en lur sutga

Il pli grond sustegn dals cussegliers guvernativs en uffizi ha cleramain Martin Bühler (PLD), il minister da finanzas reelegessan 71% da las persunas dumandadas. Sia lavur para da persvader betg be l'atgna basa mabain ha accoglientscha da sanester enfin dretg. Il politolog Michael Hermann di ch'in tal sustegn saja remartgabel, er cumpareglià cun auters chantuns n'haja el darar vis tanta popularitad tar in cusseglier guvernativ en uffizi.

Er il minister d'economia Marcus Caduff (Il Center) ha cun 61% grond sustegn per sia terza perioda d'uffizi. Sin plaz trais e quatter suondan Carmelia Maissen (Il Center) e Peter Peyer (PS). La ministra d'infrastructura, energia e mobilitad (Il Center) sustegnan 51% dals dumandads, il minister da sanadad e giustia Peter Peyer (PS) fa il mender resultat dal cussegliers en uffizi cun 50%. Da declerar saja ch'el laschia plimas perquai ch'el è stà en la publicitad cun la tematica da la finanziaziun d'ospitals regiunals che polarisescha. Vitiers vegn ch'el sco cusseglier guvernativ sanester percorschia opposiziun burgaisa.

Nagina schanza per dretg da vuschar cun 16

Sper l'elecziun da la regenza ha Sotomo er dumandà tge che la glieud pensa da tscherts temas actuals. Uschia hai dà dumondas davart il dretg da vuschar cun 16 u davart ina limita maximala da trieps da lufs.

Cleramain nagin sustegn datti per il dretg da vuschar cun 16 onns. Gnanc tar persunas tranter 18 e 35 – la pli giuvna gruppa dumandada – detti ina maioritad perquai. Il medem vala per l'idea da fusiunar las vischnancas uschia, ch'i dat en futur be pli 11 vischnancas – confurm a las regiuns.

Pli cler vesi or tar la limita maximala da lufs: surtut tar las partidas burgaisas è il sustegn grond. Sustegn ord bunamain tut ils champs politics datti per sustegn finanzial per ospitals – be ils liberaldemocrats èn là plitost cunter.

Opiniun davart ils temas tenor preferenza da partida

Candidatas e candidats, retschertgas ed analisas

Avrir la box Serrar la box

En noss dossier chattais Vus tut davart las elecziuns da la regenza e dal parlament che han lieu ils 14-06.